|
|
|
Zahari (gibang) songovian do upisol ngaavi totuo pulis IPD Keningau di ontok pomolisaan om panaasan PATI di tinaan.
|
2nd September, 2010
KENINGAU: Nakapanaan o pulis 80 tuhun noihaan Modiidikot Aiso Kasagaan (PATI) id suang iso pisokodungan IPD id doiti id suang kalaja i nakapanau id posoihi kakadazan nokotimpuun di jam ko 4.00 gisom 6.00 minsosodopon di Tadau Koduvo.
Huguan Pulis Uvang Keningau DSP Zahari Mohamed minoboos, 15 mantad i nataan di minsosodopon dino pinoidu tu nakahantoi pinopokito suat dioho di kikasagaan.
“Izioho i tinaan mantad 22 tuhun Philippine om 58 layat Indonesia tinaan montok pomolisaan om kopongintangan,” ka disido kuminaa media id doiti di koniab.
Pinopoiho i Zahari, izioho i aiso do suat intangan kumaa imigresen montok haang sumusuut.
Huguan Pulis Uvang dino minoboos, kalaja i pinapanau dino nopo nga mongintutun om manaan PATI i kikotumbazaan koundoonok koumohigan om kakasou tuhun ginumuan hoohobi no kozo koonduan ngavi kinoizonon id posoihi kakadazan.
Ka disido, tumanud pongintangan pulis komuhakan layat songkosuvazan i au pakalaja kogumuan dino sampapanau id uvang kakadazan om kikatangaban kapanakadai kumaa abaabazan kahasaan tavagat.
Mantad dino ka disido, popotihombus o pulis kalaja do soosongian nopo montok mongintutun om manaan noonombo layat songkosuvazan i sampapanau id uvang kakadazan.
Ka disido, kogumuan layat songkosuvazan mantad Philippine om Indonesia i nokoikot id pogun diti minomoguno passport kotombuhuzan sosial nga tuutulus minogiigozon om mogium pakalajaan id doiti.
“Haang diti nopo nga nakahasa om au papasaga dioho pakalaja mizon id pogun diti,” ka di Zahari.
Mantad dino ka disido, layat kinoizonon posoovon mooi do au maganu pakalaja songkosuvazan i aiso do suat di pinasaga.
“Mogiigiozn kampung mositi misokodung miampai pulis montok monguhan kobohingkangan koikatan PATI id pgun diti hoohobi no kozo id uvang sokid,” ka di Zahari.
Ontok timpu di miaga minokianu i Zahari buuan ngavi mogiigizon miaga do Mohoingon Kampung om Ponikoon Komiti kikuasa Kobuuon om Koumohigan Kampung (JKKK) mooi do mongintong ngavi kampung dioho au oikatan PATI.
Ka disido, koikatan do PATI id kampung ngavi koundoonok koumohigan mogiigizon tu kakasou tanak ngavi tondu nogi kakasou do halata mogiigizon.
|
