|
2nd September, 2010
KOTA KINABALU: Pinopoboos di koniab i Kumoduvo Vozoon Montili Sabah, Datuk Peter Pang En Yin do humabus mantad Parti Liberal Demokratik (LDP) om minamagabas savi avi kalaja id suang paati nokomoi, kaampai no sabaagi Timbang Polosidin, tuminimpuun tuutulus.
Minoboos i Puu Hintuun Koundangan Pogun (Adun) Karamunting diho do kinoputusan tobuihit diho nasansagan do minaan binuzu kinoputusan do paati diho montok momohiad nunu noopo pisokodungan miampai di Poniikon Barisan Nasional (BN) pogun Sabah, i ponogi Vozoon Montili Sabah, Datuk Seri Musa Haji Aman.
“Koiho zou do koputusan diti do kopountazag ningkokoton ku id suang kopolintaan om miampai diti popotumbozo zou montok mamagabas kalaja mantad kalaja di kivaa poinsandad om mamatos montok tumihombus tumoina id siibo kopolintaan Barisan Nasional (BN) buu’anon di Musa,” ka disido di ontok kopoihaan media id upis disido id Komontilian Komuhakan om Sipoot (KKBS), do doiti koniab.
Pang, isido ponogi i Montili Komuhakan om Sipoot pogun Sabah, minoboos do suat pamagabasan kalaja diho nopo nga nakataak no kuminaa doid di Polosidin LDP, i Datuk V. K Liew di kosuab koniab id hongkod upis LDP, maza di Monunuat Pulitik disido.
Tumanud disido, pinapaanjul isido do pituubungan miampai di Liew montok pinopoboos pomusaavan do nookuo isido do mositi humabus mantad paati nokomoi.
Poingkuo po nga minoboos vagu isido do au insan isido do minonongkiboos miampai di Musa doid kinapanadaan kinoputusan diho nga kiangkab papaanjul pituubungan miampai di Vozoon Montili Sabah di koniab.
Id tudizo nung mumpazat isido do paati pulitik suvai, minoboos i Pang do ahal diho nopo nga sabaagi iso pihi nga babaino diti, kakaal isido do aiso pomuandaman kokomoi ahal dino.
Tumanud vagu disido, iti nopo nga sabaagi koputusan di tobuihit di kosonsog do maan mantad di tabung miampai opulokis id pulitik, tuminimpuun di toun 2005.
“Ontok di pomihian tagazo nakatahib, kakaal zou kaanu modop sundung tu ouzan do kimpin om nohiputan do mogisusuvai sosoto, nga baino diti, sosoto diho suvai kozo, gisom do au zou kaanu modop mantad po di sominggu nakatahib,” ka disido.
Id tudizo do kopiumanan disido, minoboos i Pang do baino diti, kikopiumanan isido do kotongob om nokoungongos.
“Nunu i minaan ku diti nopo nga montok kounalan do majority layat Sabah. Mimang zou do mongiho kozo do kopolintaan Barisan Nasional (BN) do kotihombus pointoonong o kaadas tu miampai diti, kotundaan montok kounalan layat Sabah do aanu maan,” ka disido.
Piuvahan do LDP om di Musa nopo nga notimpuunan di songian i Kumoduvo Polosidin LDP, i Chin Su Phin, pinopoboos do paati diho obuihit misokodung miampai di Musa, nga potounda misokodung miampai do Umno om manaak sokodung poimponu kumaa di Huguan Montili, Datuk Seri Najib Tun Razak.
Minaan o kopoihaan diho binuzu kopiumanan au osontob ginavo kumaa doid lahan di Musa minonoguvang ahal ngaavi di pinoimbuhai do LDP di ontok pitimbungakan BN pogun Sabah di kavavagu diti, kaampai no kogompit singizanak Mazu.
Di tadau Minggu nakatahib, pinopoimagon i Monunuat LDP, i Datuk Teo Chee Kang do paati diho poingkakat poimpantod id douvi di Su Phin id piuvahan vagu kozo id piahatan do paati nokomoi miampai kopomuu’anan di Musa.
Di poguhui diti, nokokinam o LDP do monoto di Musa kogompit kinoputusan disido do popotindooi di Raymond Tan sabaagi Kumoduvo Vozoon Montili.
Minongunsub o LDP di Musa do manatak di Raymond, i ontok dii au poinsuang id nonomboo paati komponen BN di kahapas minonoodo koputusan humabus mantad Paati Maju Sabah (SAPP).
|
