|
1st September, 2010
KOTA KINABALU: Mitingan Tagayo Tounan Parti Bersatu Sabah (PBS) Bohogian Karambunai di kaawagu minamaramit om pinopolulus atag mokianu lalansanon takawas Barisan Nasional (BN) do manahak kosiwatan kumaa parti dilo’ tumanding id tindikohonon Parlimen Sepanggar doid pomilian tagayo obontol.
Atag nopo dilo’ nga’ iso’ mantad di tolu atag i pinawalad i kapaampai do pomoromitan boboroson di Luguan Bohogian PBS Karambunai i OKK William Majimbun om i atag kopoikidan kuasa’ doid nayatan lalansanon mogisusuai nayatan parti komponen BN.
Nokopogulu dilo’ id boboroson disio, ka di William, kaanu o PBS popoguli’ kawagu tindikohon Parlimen Sepanggar kumaa calun BN doid pomilian tagayo obontol.
“Pasanganu tokou do raan di poinsodia’ kumaraja’ montok kalantaion do BN, pasanganu tokou do piromutan osuau om ogirot id pogialatan di lalansanon parti komponen BN kaampai no i Ponorikohon BN Sepanggar i Jumat Idris om mobi’ rayat Karambunai i Datuk Jainab Ahmad Ayid.
“Toririmo tokou do mongoi kakap di raan tokou om nakaramit do ogumu’ atag. Nakaramit tokou nogi’ do atag mantad mitingan bohogian.
“Mimpau do kopokionuan di tongo’ puru PBS id nayatan siriba’ nogi’ lalansanon bohogian, pointalangon ku do kiguno PBS onuan kosiwatan tumanding id tindikohon Parlimen Sepanggar doid pomilian tagayo obontol,” ka disio.
“Rinamit om pinolulus tokou kototolu atag diti montok posukuon kumaa lalansanon takawas PBS do owiton om pibarasan doid mitingan parti-parti komponen BN,” ka di Puru Kounsol Takawas (AMT) PBS, i Ng Loi Tect di maso minonorikohon mitingan tagayo nokomoi.
Ontok pinapawalad do tolu atag nokomoi, i Luguan PBS Karambunai i Rosli Sator, minoboros do pointonod noturidong di toun 1985, nakalantoi o PBS do watas Sepanggar maya’ do calun di maso dilo’ i Yong Teck Lee (Datuk Seri) om mimpau do kointalangan do babaino’ do pasanganu PBS kosompuruan di ogumu’ doid watas diti, kosudong kopio do onuan o PBS kosiwatan tumanding tindikohonon Parlimen Sepanggar.
Naamot dino, ontok pinopoimagon mitingan tagayo dilo’ i Kumoduo Presiden PBS Almudin Kaida minokianu di tongo’ puru watas Sepanggar do monginggirot tinimungan miampai popokito ginoris do kaanu yolo’ manahak kalantaion kumaa calun BN doid pomilian tagayo i pikikiro pohoroon do amu’ no alaid diti.
“Bohogian PBS Karambunai kiguno popososodia’ di kukumaraja’ pomilian tagayo mooi do kosodia’ soira’ orikot pomilian tagayo,” ka disio.
Mitingan tagayo dilo’ pinoindalan doid songinan hotel doid longkod kakadayan Kota Kinabalu, om notindapou di 200 mongongobi’ nogi’ mio’ontong.
Nokotindapou po nogi’ i Luguan Koonduan PBS Datuk Jamilah Sulaiman om AMT PBS kaampai no i Ispak Adok, Salbin Moksin, Mohd Lin Harun, Ali Zaman, Roslan Muharam om i Timbang Luguan Komulakan PBS i Awang Rahim Lasim.
|
