|
1st September, 2010
KUALA LUMPUR: Datuk Seri Najib Tun Razak minoboos mogiigizon au kavasa papasaga lahan koposizon layat Malaysia i mongintong kumaa kopogisusuvazan om uha-uha oovit do koulalaho noindadamaan i nokoimbuhai mazaa ahal ngavi kotinouvan miampai agama.
“Saviavi onu i naanu dotokou, saviavi onu i tinoodo om saviavi onu i hogoon dotokou, oumbak om opunso do osikap. Saasabap no dino, tokou mositi momohoogo kotoonongon, sinuau om kaadangan di kivaam” ka di Huguan Montili id suang pason disido kopiondot Tadau Kabangsaan ko-53 i lamazon baino.
Minoboos isido noikot no timpu sinakagon baino montok popobuu Malaysia kumaa nazatan kobuuon om kotoonongon di hobi kinavas.
Huguan Montili minoboos ponginaman tootopot layat Malaysia baino diti noponga montok papadahin pogun mooi adadi iso pogun kobuu kitangazan takavas koikatan 2020.
Kumaa dino, ka disido, kopolintaan minagansak ponimpunan ngavi di tapatod id suang boogizan palan kodohinan kopolintaan (GTP) om palan kodohinan ikonomi (ETP) sabaagi palan ikoton di tatahang kumaa hizab tabaakas dino.
Tumanud di Najib, kinahantazan pinapadahin Malaysia mantad iso pogun pomutanaman kitangazan tosiibo kumaa pogun pomounan kitangazan uha-uha, nopo nga asil pinomusaavan, poguhudan om kalaja tavakas kopolintaan miampai layat miampai kinigitan kumaa falsafah montok tomoimo id doguvang maganu kovohion om koinvoguvan.
“Asil topiumanan au mimang asantaban ginavo kumaa kointutunan quo i kivaa no haid om kookunan dumahi, posoguhuonon ngavi dotokou nokoovit Malaysia kumaa kahantazan om kahantazan sabaagi iso pogun.
“Baino diti noikot nodii timpu sinakagon dotokou montok popobuu Malaysia kumaa nazatan kobuuon om kotoonongon di hobi kinavas. Pogudizaan dino, katama nangku tokou mamabak koubasanan montok humantoi asil di nakatahib koubasanan,” ka di Huguan Montili.
Pinopogompit ikoton tokoh ngavi kingaan pogun, minoboos i Najib mohoing kusai ngavi kipomuanan pogun au insan nasantaban ginavo montok monoimo koozuzuvo di kivaa sundung tu songkuo nopo ginazo ponginaman di notoguvang.
“Izioho tomoimo mangazou om mongkimamaa kumaa monoodo timpu dumonto di hobi vinasi montok pogun om layat,” ka disido.
Minoboos i Huguan Montili potitikid songuhun tanak Malaysia nopo nga kiguno om kitangazan manakadai kumaa kapanadaan kotoonongon om sinuau nasional om noikot nodii timpu montok momoguno poimponu dino toihaan ngavi kinoizonon di kivaa.
“Olugi kozo dino pogun nung toihaan ngavi i nohuda dotokou miampai saviavi pongkimamaan, mindahiu montok mogium paun di hobi ohuub,manda no do au nakahantoi dotokou minonoodo posoihi di hobi vinasi montok dioho manakadai.
“Iti saasabap no do koozuzuvo sompomogunan okon nopo mongintong kohuzungan touhan pukuon om teknologi tumahib pivohitan nga nogi popoompit do kopohuzungan misosondi pomitanan tuhun,” ka disido.
Minoboos i Najib montok humantoi hizab timpu dumonto di hobi vinasi, Malaysia mositi popotindooi pihumaagan nasional i nadadi impoon kotoonongon om kaadangan sohinaid diti.
Montok dino, ka disido, ponimpunan pilotian layat Malaysia mositi poinsondiu di tangavasi i piomungan om piokunan saviavi tinau miaga i poinsuang id ideology kabangsaan i baino Rukun Negara om poinsuang id Perlembagaan hongkod sabaagi do kuntilik sosial nasional.
Pinoposoou nogi i Najib layat do kopolintaan i kivaa kalati kozo montok papataan kinoonuan pomolinsaan sondii om kapamantangan pogun miampai saviavi kalalahano undang-undang om vinakas di kivaa mantad sangod id suang toi ko dahabus.
“Ondomon nopo do, Malaysia nopo nga tana kinosusuvon dotokou, id doiti tokou nosusu, id doiti tokou guminazo, id doiti tokou minogium pomiukutan, id doiti tokou minonoodo kounsikaan om id doiti tokoi miampai pinanaak minamangun, poopion tokou id doiti,” ka disido.
Monuu isido tuhun Malaysia kopiondot koponoimaan kouhitan toun kinoonuan pomolinsaan sondii timpu diti montok misokodung miampai iso angkab montok mamadadi Malaysia pogun di tavasi.
“Montok timpu dumonto tanak ngavi dotokou, kotihombusan Malaysia mositi pataanon. Kada no kozo i tavasi ababak, kada no kozo i mioput oputu.
“Kahansanan dotokou kaanu kovosian,” ka disido.
|
