|
30th August, 2010
NABAWAN: Rayat pogun diti kiguno mananud di kinomogoton sompomogunan mooi do koponokitopong di pogun labus doid kopinsingilaan ICT kopiongoi di kinomogoton do buris alaab (jalur lebar) pomogunan di nokoinggayo.
I Panakadai Montiri Pomutanaman om Pomorunan Takanon Sabah Datuk Bobbey A. Suan, minoboros do aanu mongilo o ICT maya’ do buris alaab om rayat pogun diti kiguno umampai mooi do amu’ oiduanan id timpu pomogunan aiso’ sapad do babaino’.
“Kiguno koporintaan mongingkawas kopotundaan sosiol, ikonomi, kagaganapan om kopotundaan kinoulunan (insan) mooi do kotilombus karamit kosimbanon doid mogisusuai sunduk,” ka disio.
Minoboros isio dilo’ id ramai kinopoikidan Komputer 1Malaysia (netbook) i pinisokodungan manganjur do Suruhanjaya Piromutan om Multimedia Malaysia (SMKMM) om Upis Palajaran Watas Nabawan doid Lintuhun SMK Nabawan di kaawagu.
I Bobbey i po nogi’ Puru Lintuhun Koundangan Pogun (Adun) Nabawan minamason di tongo’ mamaramit do momgouno poinsonong toluod dilo’ kosuul no id pinsingilaan.
Naamot dino montok di amu’ po nakaramit, pinokianu disio yolo’ ngaawi’ do tumoboi naamot sabab kopoikidan dilo’ powonsoiyon do momorinut.
Pinointalang disio do kopoikidan fasa koiso’ id Sabah, soginumui’ do 9,500 tinan komputeri 1Malaysia i kapaampai do 19 watas nopili’ miampai do 500 tinan komputeri montok iso’ watas.
Naamot dino i Potunud SKMM Watas Sabah om Watas Pisompuruan Labuan i Ahmad Nor Hisham Mohd Yusof, minoboros kopiongoi di angkab 1Malaysia, i mimang do mamalapus 50 pihatus buris alaab, kopoikidan do komputeri kosudong kopio.
Ka disio, soginumu’ do 175,000 netbook maan poikido’ id fasa koduo i kapaampai do 25 watas id Sabah.
Naamot dino, kapamansaian do 212 ‘menara’ id Sabah nopo nga’ pinggisaman kopoinggayaan do buris alaab mooi do kapamalapus di rikoton kotorinaan maya’ 3G nogi’ sigampot do kapadakatan buris alaab id linimput koprointaan do aiso’ kabayar om aramit nogi’ do rayat.
Nokotindapou po nogi’ id ramai dilo’ i Monorina’ Tagayo TM Berhad i Sukurriya Masri, Upisor Palajaran Watas i Osman Aganduk, Lansanon Komogoton Rayat (PKR) Nabawan i Jubelin Kilan, Molohingon SMK Nabawan II Mike Eping om kikiro do 700 molohing.
|
