|
30th August, 2010
KUALA LUMPUR: Panadaan kohobusan video di popoimbuhai sentimen kotinau’an nopo nga mositi ontokon haang tokodou mooi do au iho adadi koimaan id tatanga do layat id pomogunan Malaysia diti, ka di Montili Kopoihaan, Pionitan om Koubasanan, i Datuk Seri Dr Rais Yatim.
Minoboos isido do koimaan miaga diho nopo nga miho maan id kategori sabaagi ahal di kadaandang seksyen 233, Akta Pionitan om Multimedia 1998.
Panadaan miaga diho ka disido nopo nga au apatut obii sababaa sabaagi miaga tomoimo, om kopotongob kozo iho tu piipio hinaid do minundun mamahantoi kemerdekaan om monuidong pogun, apatut daa o tuhun mogigizon id pomogunan Malaysia diti do adadi hobi sinukod.
“Nunu o kaanangan montok dotokou, miaga po toi do poponini hozou Negaraku, monimban oiton dino, mamagais voos di Yang di-Pertuan Agong toi monoodo video miaga diho.
“Iti pointahang popoinsiibo po vagu do ningkokoton dotokou sabaagi iso pomogunan om iso bangsa id siibo gagasan 1Malaysia,” ka disido kuminaa doid monunuat abal di ontok udizoo kokomoi haanf di Wee Meng Cheng toi nointutunan sabaagi do i Namewee, i minonguhit koimaan di komozon alaat miampai minonoodo klip video di kaanu poposikit tapui kotinau’an.
Di poguhui diho, suminasi i Rais do pinghudaan poimponu panaandakan Tadau Kemerdekaan ko-53 id Stadium Putra, Bukit Jalil, do doiti i nakaanjul somok duvo jaam.
Namewee, songuhun komuhakan mantad Muar, Johor, miaga di pinovuhai id suang laman web YouTube, minonood klip kikavo doun kotinau’an miampai pinopohivos kuminaa kiis songuhun mongingia di noboos do minonoodo boos kikavo kotinauan, vookon suvai, mogohundaat do mongingia nokomoi om nogi minangait do Komontilian Balajalan Malaysia sabaagi okuang ajal.
Minoboos i Rais do id ahal diti, ahansan o komontilian disido doid Luyal Pogun maganu haang hobi pinulokis montok monguhan ahal ngaavi di kikavo doun kotinau’an mantad do kotihombus aantakan.
Minoboos isido do misokodung o boogizan disido montok mongintong video nokomoi om mongiho dino miampai objektif, poingkuo po nga mozo kumaa do Koupisan Luyal Pogun om boogizan kokuasaan nung haang onuon o haang undang-undang.
“Nung id Britain, au aanangan o tuhun mamagais voos the Queen…nookuo tokou id Malaysia tu aanangan kozo mimang do ahal miaga diti. Dadi montok mongivad diho, mositi apantod o undang-undang,” ka disido.
|
