|
30th August, 2010
KOTA KINABALU: Tomoimo o Umno Sabah manaak sokodung poimponu dino kumaa do Vozoon Montili di hinansan do paati komponen Barisan Nasional (BN) do suvai id siibo sistom mogisosovohi kalaja Vozoon Montili di poguhui diti, ka di Vozoon Montili Sabah, Datuk Seri Musa Haji Aman.
Mantad diho, isido ponogi i Poniikon Tinan Pionitan Umno Pogun Sabah om Poniikon BN pogun Sabah, ahansan do paati komponen BN do suvai nga mimang nogi miaga dino kumaa doid Vozoon Montili mantad Umno.
Musa, 59, dinadi sabaagi Vozoon Montili Sabah di ko-14 di ontok ko 27 vuhan Kotohu 2003, minonovohi di Tan Sri Chong Kah Kiat, i sabaagi polosidin Paati Liberal Demokratik (LDP) di ontok dii, id siibo sistom mogisosovohi kalaja Vozoon Montili.
“Zotokou id suang Barisan Nasional, mositi do mogilalati doid tiso om tiso. Kumalaja tokou miampai consensus om tomoimo o Umno manaak sokodung kumaa paati komponen BN.
“Ontok di sistom mogisosovohi kalaja Vozoon Montili di poguhu, potitikid Vozoon Montili di dinadi i hinansan do paati ngaavi komponen, tomoimo o Umno manaak sokodung di poimponu…dadi, ahansan tokou do paati ngaavi suvai nga ingkaan nogi songian o buuan Umno adadi Vozoon Montili,” ka disido kuminaa doid monunuat abal di kahapas tuminindapou abaabazan kinapataakan sedekah jariah Al-Mubarak id Mosogit Kakadazan Tagazo Kota Kinabalu, id Likas di koniab.
Minoboos i Musa diti di ontok pokionuo mongomi boos di kumoduvo polosidin LDP, i Datuk Chin Su Phin, i mongudizo do kopomuu’anan disido.
Id boosi disido di tadau Koduvo nakatahib, minoboos i Chin do au kaanu o LDP misokodung miampai di Musa, poingkuo po nga tumihombus sumokodung om misakadai miampai Umno, suvai ko manaak sokodung poimponu kumaa di Huguan Montili Datuk Seri Najib Tun Razak om nogi gagasan 1Malaysia disido.
Di songkoniab, minoboos i Kumoduvo Poniikon Tinan Pionitan Umno Sabah, i Datuk Seri Salleh Tun Said Keruak do kivaa buuan LDP miubu miampai boogizan pointantu montok papaatu di Musa.
Noboos nogi i Salleh sabaagi minoboos do boogizan diho nga monguhud nogi montok mokianu di Huguan Montili manatak di Musa mantad kalaja poniikon BN Sabah.
|
