|
29th August, 2010
KIMANIS : Sundung tu do atangkangau miampai kalaja sabaagi Montili Habus Malaysia, poingkuo po nga pointantu i Datuk Anifah Aman do poposivat timpu montok mahik id uvang Parlimen Kimanis montok sumoomo do layat id uvang disido id suang Abaabazan Ziarah Ramadhan. Abaabazan diti nopo nga sabaagi pinggisoman disido montok popionit pihumaagan do buuan miampai mogigizon.
Ahansan isido do miampai lahan diti, mogigizon nga kaanu nogi popobuzu kopoihaan kumaa doid kobohingkaangan di otoguvang dioho om miampai koikatan disido id vuhan ramadhan diti, mombu do mogigizon mintikid hamin diho kaanu manakadai do mogigizon di au songkuo koimauan montok manaandak Hari Raya Aidilfitri di maso dumonto.
Id abaabazan di pinaanjul songovian do Puteri Umno Kimanis om puu komiti Umno Boogizan Kimanis, minombo i Anifah do piipio kampung id kinoizonon Mukim Kimanus, vookon do kampung ngaavi di nosivatan disido do minombo nopo nga id Kampung Brunei, Kg. Brunei Ulu, Rancangan Kimanis, Kg. gadong, Kg. Jawa om Kampung Manggis Kimanis.
Id abaazan momiombo toi Ziarah diho, minanaak nogi i Anifah do sakadai kuminaa doid mogigizon ngaavi di momoguno dino montok monginggaan vinagat di otoguvang montok manaandak Hari Raya do tiinu. Pinopobuzu nogi i Anifah om i sinavaan disido miampai do paganakan do kain montok goungon Hari Raya kuminaa doid tina ngaavi osonguhunan, tuhun ngaavi au spngkuo kadansaan om tanak ngaavi noduanan mohoing.
Songuhun tuhun nohoing id Kg.Brunei Laut, Kimanus di notuubung, I Kassim Taha, 80, minoboos do kinoikatan di Datuk Anifah id hamin disido id vuhan Ramadhan diti nopo nga kopounsikou kozo disido tu nakaanu i Anifah minanakai tokuudi dioho montok panaandakan tagau tagazo…”kotohuadan Datuk Anifah, tikid toun songian vuhan mogkodos, pointantu koikot i Datuk sundung tu atangkangau id KL (Kuala Lumpur). Tomoimo nodaa i Datuk id kozuzuvo ohidas. Allah no kaanu momohusi kovosian di Datuk”, ka disido.
Montok di songuhun tina di maso sumakit om kaanu noopo humingkozod id tiikon om tilam di ontok udizoo, minoboos miampai ohou di nounsikou kozo, minoboos do: “Kotohuadan Datuk tu minonohuod ko dogo do tiikon buhandai (wheel chair), kikizop tongus, minonohudo dogo kain basaan om minanaak dogo usin Hari Raya,” ka dosido di ontok nongoi omboo id hamin dosido id Kampung Brunei Ulu, do doiti.
Id kinosivatan diho, sinusuut nogi di Anifah do monooi soomo do susumikul ngaavi id Sikul Ugama Islam Kampung Brunei Kimanis, Papar.
Piipio tanak sikul di notuubung nga minoboos nogi do monongkotohuod kozo izioho kuminaa doid di Anifah tu minanaak dioho do ‘Angpau Raya’. “Kotohuadan Datuk om paganakan”, ka dioho.
|
