|
29th August, 2010
KENINGAU: Pinoposoou i Puu Hintuun Koundangan Pogun (Adun) Bingkor, i Justin Guka doid susumikul ngaavi di minonoimo kouhanan kompuitol 1Malaysia mooi do au momuhasa momoguno dino.
Ka disido, kopolintaan maza do Suruhanjaya Komunikasi Multimedia Malaysia SKMM) id siibo do Komontilian Kopoihaan, Pionitan om Koubasanan, di popotikid do kompuitol 1Malaysia diho, pinapahaab pomogunaan ‘jalur lebar’ id tatanga do susumikul.
Ka disido, id vinoun pionitan om multimedia di obobo tumunda, vaza mantad momentum globalisasi di maso minsavat, mositi o Malaysia do tumihombus popobuu kabaahan ontodonon tuhun.
“Pinggisoman ngaavi popoimbuhai iso komuniti di koiho Teknologi Kopoihaan om Pionitan (ICT), toimoon do layat om mongomoi do toguvangon do ICT kiguno kozo montok savi avi tinimungan tuhun ginumuan miampai au popobibi do mogigizon i poingizon id kakadazan toi ko id habus kakadazan,” ka disido di ontok pinopotimpuun panaakan kompiutol 1Malaysia di Sikul Pangan Takavas (SMK) Bingkor, somok doiti di koniab.
Soginumu do 500 susumikul mantad duvo sikul, iho nopo nga SMK Bingkor om SMK Apin-Apin, nokotoimo kompiutol 1Malaysia nokomoi.
Minoboos i Justin do maza ICT, ogumu kopoihaan balajalan om toihaan di miho aanu maza internet di mimang do kopouhan kopogiuman kopoihaan.
Sundung do poingkuo ka disido, au nogi okudi o kopoihaan om bakaang ngaavi di au avasi, kaampai no laman web tazamut do posuangon maza internet id suang timpu globalisasi toi vinoun aiso pivohitan i koimang do vinoun baino diti.
Mantad diho ka disido, mositi o susumikul do momoguno kouhanan ICT montok koonuan kopoihaan om toihaan di manaak kounalan kumaa doid balajalan.
Minoboos isido do maza pisokodungan miampai do Komontilian Balajalan Malaysia (KPM), kopomoiganan kavasaan montok potitikid susumikul di pinosuat pinosuang montok monoimo kompuitol 1Malaysia nopo nga pinapanau tumanud koimauan paganakan, aiso kotoinaan ‘jalur lebar’ id hamin om nogi katanau gontob panaakan 1 kompuitol hopizon 1Malaysia.
Ka disido, koonuan suang hamin RM3,000 id siibo nopo nga intangan sabaagi tanda gontob tinimungan okudi koimauan di kosudong monoimo kompiutol hopizon diho.
Potindapou nogi doid abaabazan diho i Kumoduvo Potunud Suruhanjaya Komunikasi om Multimedia (SKMM) Uvang Sabah om Tana Pisompuuvan Labuan, i K Juslly Elis, Panakadai Upisol Balajalan Uvang Keningau, i Drs Selamat Ismail, Huguan Sikul SMK Bingkor, i Sahumin Haji Daud, hahansanon Huguan Sikul SMK Apin-Apin, i Mohd. Safri Mokti om buuan ngaavi mogigizon id uvang nokomoi.
|
