|
29th August, 2010
KOTA KINABALU: Kumoduvo Ponikoon Tinan Pitubungan Umno Sabah Datuk Seri Salleh Tun Said Keruak minamada kivaa buuan Parti Liberal Demokratik (LDP) miupakat miampai boogiza nakatantu montok papaatu di Vozoon Montili Datuk Seri Musa Aman.
Minoboos isido boogizan dino nga moguhud montok mokianu Huguan Montili Datuk Seri Najib Tun Razak mongidu di Musa sabaagi do Ponikoon Barisan Nasional (BN) Sabah.
“Otumbazaan izikoi kivaa huguan id sambahik saviavi diti om koiho izikoi onu i tinoodo dioho, nga izikoi BN Sabah au popohogos dioho monoodo abaabazan dioho i monoodo nuununu sangod sondii kumaa di Datuk Seri Musa,” ka disido id suang iso kointahangan id doiti di koniab.
Salleh i nogi bagas Vozoon Montili minongudizo katapatan id sambahik kointahangan LDP Datuk Chin Su Phin ontok Tadau Koduvo nakatahib, om minamadawa do ino nopo nga vookon mantad plot montok papaatu di Musa.
“Otumbazaan izikoi do kogumuan buuan LDP nopo nga rasional om uha abaa montok popiaga piahatan di pointunud om di nakahasa, hoohobi no kozo songian ahal i pinogompit di Chin popoompit do kopotutan sondii tuhun suvai.
“Koozuzuvo dino dati misuvai nung ahal i pinogompit nopo nga kogompit kopotutan mogiigizon,” ka disido.
Isido kahapas dino minamason buuan LDP mooi do au popohogos dioho aahung do boogizan ngavi nakatantu i kivaa abaabazan sondii.
Otumbazaan i Salleh saviavi parti komponen BN Sabah monokodung di Musa i nogi pintahang tangangazan disido dino momuuan pogun mantad po mongigit kalaja Vozoon Montili di 2003.
Id suang kointahagnan disido di Tadau Koduvo, nosogu i Chin minoboos do LDP au nodii kaanu pakalaja miampai di Musa nga tuutulus monokodung om misokodung miampai Umno miamapi pinopoiho sokodung poimponu kumaa Huguan Montili om gagasan 1Malaysia dino.
|
