|
30th December, 2020
Di NOOR ZAFIRA SHAFIE
KOTA KINABALU: Puru Lintuhun Koundangan Pogun (ADUN) Sinili i Datuk Amisah Yassin minokianu oinsanan bohogian montok lobi kopoduli’ di koyuyuon do tulun ngaawi’ kikosuayon i kikobolingkahangan id kinoinanon om tutok.
Ka disio mogigiyon kiguno toririmo manahak pongunsuban, sokodung moral om ponguhupan poinpatut kumaa tinimungan ngaawi dilo’, lolobi no kumaa paganakan i pasanganu tangaanak miagal dilo’.
“Apatut tokou manahak kopomodulianan kumaa diolo’ sabab okon ko’ asanang do monompuan tangaanak posuulon i kiharo kobolingkahangan miagal do Sindrom Down, autisme, disleksia, odomut id pinsingilaan toi pomoboros.
“Yolo’ diti pikikiro pasanganu kokurian id kinoinaon toi tutok nga’ otopot nopo, yolo’ nopo nga’ koponoluod kumaa mogigiyon nung otudukan do pointantu’,” ka disio.
Minoboros isio dilo’ soira’ rinubaan New Sabah Times id kinotombuluyan id Bukit Harapan, Jalan Tuaran Bypass do hiti di kosuabon konihab.
I Amisah po nogi’ Luguan Srikandi Bohogian Ranau minoboros nogi do tinimungan dilo’ momoguno kapanamangan poinloolobi montok papasaga’ diolo’ mindalan koposion tikid tadau do poinsonong.
“Momoguno yolo’ ponontudukan pinotomod mooi do nunu nopo i pasanganu diolo’ aanu mongimbulai om oguno potilombus dino kapasaga’ diolo’ monoluod kumaa kotundaon pogun.
Id kinotombuluyan dilo’ pinopotoluod nogi i Amisah do babarang panamong tinan om koborisian nogi’ takanon suai ko’ cek kumaa mongingiyon Bukit Harapan.
Bukit Harapan noiyon-iyon do 45 mongingiyon tulun posuulon om ibu tunggal om noukaban pointonod podi ko 9tw Koiso’ 1989 id Keningau pogulu pinoundaliu id kinoiyonon noondo id Menggatal di 2007.
Tinimpuunan ilo’ di Datuk Anne John P. Arulnasalam Keyworth om baino’ diti torinaon di Audra Keyworth om i Jerry Kamijan.
Montok di orohian do papatahak toluod kumaa Bukit Harapan, kaanu kou momoromut numbur 088424567 toi i Jerry
id numbur, 0138656622.
|
