|
29th December, 2020
BELURAN: Komontilian Pomutanaman om Pomounan Taakanon (MAFI) mongintong sakadai komontilian dino gunoon tavavasi kaampai no montok papavakas boogizan pomutanaman id lahan saviavi id Sabah.
Montili dino Datuk Seri Dr Ronald Kiandee minoboos Sabah nopo nga papahabus taakanon di okito kozo om poinsoguhu id pogun diti.
“Kotundaan infrastruktur id suang pomutanaman kaanu popokito kavakasan pomounan diti id Sabah id suang toun ngaavi mikot,” ka disido kuminaa magaganu abal kahapas tuminindapou koponoimaan Tadau Krismas naazu Kounsol Panambazangan ngaavi Uvang Telupid id Kampung Bauto, id doiti di totuvong koniab.
Ronald i nogi Puu Parlimen Beluran minoboos iti kopitanud miampai pilotian Polinta Hongkod om Polinta pogun montok popotihombus kotundaan layat Sabah.
Ka disido Polinta Hongkod om polinta pogun i miuhud popovihiu Sabah id kinavas kotundaan i pokionuon do layat Sabah.
Naamot dino, minoboos i Ronald kosimbanon pulitik baino miampai polinta pogun papanaon Gabungan Rakyat Sabah (GRS) mositi intangan tavavasi.
“Ino nantakan mazaa koponoinaan demokrasi om nadadi tonggungan kumaa polinta montok mongintong kotumbazaan pataakon do layat id pogun diti posoguhuonon hoohobi no kozo id suang boogizan kotundaan,” ka disido.
Minoboos i Ronald pointantu no mongintong isido koponoinaan kotundaan id Sabah aanu monuhuk miampai pisokodungan togiot piahatan Polinta Hongkod om polinta pogun. Bernama
|
