|
23rd December, 2020
DI ROZZALIN HASHIM
SANDAKAN: Tanah rizab kokompungan kiginazo 68 ekar id Talun-alun Cecily, Batu 4, somok doiti, pobuuon sabaagi izonon montok Kampung Warisan Karamunting Lama.
Ponikoon Komiti Maganu Haang Kampung Warisan Karamunting Lama, Lalan Cecily, Batu 4, Mohamad Bakar pinopoiho tana rizab dino nokoimagon no ontok toun 2017 do polinta pogun di nokosoguhu.
Tumanud disido, tana diti i noupalai ontok 1994 om pinasaga sontoun kahapas dino kiangkab montok popotindooi mogiigizon Kampung Karamunting Lama i hamin dioho minaan vuzaso montok manaak lahan kumaa kapanadaan Lolokiton.
Minoboos isido, gisom 2003 nopihi isido sabaagi Ponikoon Komiti Maganu Haang montok monuhung monguhan kobohingkangan di nokoimbuhai poguhui diti.
Ka disido, ontok 2003 om 2004 touvi no dino boogizan koupisan polinta di kogompit minonuku tampat tana montok dodizon sabaagi uvang kokompungan poguhui pinataak kumaa koponoinaan kopomoiganan.
“Sundung i do ingkaa, kotoinaan popobuu tampat tana iti nopo nga nokohuntan sokuudi kuang hobi vahu toun gisom no minongkimamaa kozo minonguhan kobohingkangan ngaavi di nokouhuntan.
“Ontok toun 2015, minonuidong izikoi iso kopolitif i ointutunan sabaagi Koperasi Warisan Karamunting Lama Berhad montok monuhung monguhan monoina tanah rizab kokompungan diti, ontok toun 2017 nokoimagon ino sabaagi tampat kokompungan,” ka disido.
Minoboos i Mohamad kumaa magaganu abal id suang pitimbungakan abal kahapas Pamasangan Papan Tanda Kampung Warisan Karamunting Lama id Talun-alun Cecily, Batu 4, somok doiti, di koniab.
Pinopointahang poingonop, isido sabaagi Ponikoon Kopolitif Warisan Karamunting Lama Berhad minoboos kokompungan warisan diti popotindooi posoihi 100 paganakan mogiigizon Kampung Karamunting Lama.
Moguhud tokou monoodo hamin kavo toiso-iso i nogonop miampai saviavi kouhanan om ahansan nung aiso kaantaban koimbuhai kokompungan diti, tokou kivaa izonon di hobi vinasi om au tagal nodii miundadahiu, uvang di kosudonog kozo monguhan dioho mokitoina om suusuvai po,” ka disido.
|
