|
29th July, 2010
KUALA LUMPUR: Soginumu’ do 21 kiis susumikul i notianan om minogkosusu tanak id labus pisasawaan pointonod di toun 2006 gisom baino’ i noilaan do Komontirian Palajaran Malaysia.
Kumoduo Montiri Palajaran Dr Mohd Puad Zarkashi minoboros do 12 mantad dilo’ naantakan id sikul labus kakadayan om siam id watas kakadayan.
“Pinonoriukan di pinoindalan do komontirian nokopokito do 20 kiis nopo nga’ sopiuhang naamot iso’ kiis nokopogompit do sinambarana’,” ka disio.
Ontok minonimbar ponguhatan di Senator Datuk Azian Osman doid pitimbungakan Dewan Pogun do hiti di konihab, minoboros isio do koinsanai kiis nokomoi naantakan id suang watas pomuwalaian sompopori.
Tumanud disio, kointalangan nokomoi naanu maya’ Koupisan Palajaran pgoun, Upis Palajaran Watas, sikul om nogi’ Koupisan Kotundunan Mogigiyon.
“Sabaagi pinggisaman montok monoibau kobolingkahangan sosiol kapaampai susumikul sikul, komontirian maya’ do kotorinaan Kapangahakan om Kaunseling pinapaanjur ababayan kopointalangan kokomoi ‘seksualiti’, piombolutan id pialata kusai om koonduan nogi’ karaaralano’ poingkuro do monongkiambalut miampai di tongo tambalut,” ka disio.
Minoboros isio do kogumuan kiis di naantakan nopo nga’ sababab no do ginawo di orohian do ‘minsingumbal’ suai ko’ nonuan koposimbayanan di adalaan mantad paganakan.
Suai ko’ pinggisaman do bohogian sikul, komontirian nga’ minamason nogi’ di tongo’ molohing toi mananamong mooi do lobi opoduli’ om mongilo di pogiombolutan do tanak diolo’ miampai miontong-ontong di kosimbanon do pogogoyuon diolo’ do potitikid tadau, ka disio.
Minoboros isio do komontirian maya’ kosokodungan tinan okon doun koporintaan (NGO) nakapamalan om pinopoindalan pipiro ababayan montok monuduk di susumikul kusai om tondu’ kokomoi do seks om potilombus dino mokianu diolo’ do tumaru poinsurat mooi do manamong kapantangan tinan gisom no doid pisasawaan id kopupuson do ababayan nokomoi, ka disio.
Pinopoilo i Mohd Puad do ababayan dilo’ maan poonjuro’ doid sikul-sikul suai kaampai no pinsingubasan poinbida’ montok Mongingia’ Kapangahakan om Kaunseling di poinggompit doid ababayan nokomoi.
|
