|
|
|
Ingkaa no koozuzuvo hamin i tigaaba no
|
29th July, 2010
KENINGAU: Iso hamin papan id Kg. Lingkudau somok no do ouhun saasabap no do hizud minonigog id bavang Bariawa di kuang hobi jam ko 5.00 minsosodopon di Tadau Koiso, nakatahib.
Sundung i do ingkaa mogiigizon hamin diti nokosivat minundahiu om minogovit humabus balang ngavi dioho poguhui vaig nokoinsavat.
Tumanud di Pemaju Mukim Lingkudau Amir Jani hamin dino izonon do sizam tuhun dino poguhui diti nohizudan nogi haid ontok hizud minonigog piipio vuhan di nakatahib id nombo ontok dino tisan nopuut om somok no kopongumbak hamin dino.
Nga ontok timpu diti ka disido, hamin dino nabanging om tigaaba nodii om piipio boogizan dino noumbak.
“Baino au nodii atampasi ino do izanan tu nabanging nodii om mindad nopo timpu do mimang gondop toi ko umatu id bavang di poindoos,” ka disido kuminaa New Sabah Times id doiti, di koniab.
Minoboos isido, hamin dino nadadi izonon kowolisan dioho i au songkuo tangangazan sundung tu sanganu nu no kozo dino nopo nga i Norjana Jani i nokoundahiu no id hamin kavavagu dioho.
Mantad dino humansan kozo i Amir, boogizan kogompit kaanu maganu haang tosikap om papasaga sakadai hamin kumaa paganakan nokogompit id siibo Abaabazan Sakadai Hamin montok paganakan mosikin.
Pinopoiho i amir, paganakan nokogompit poinsuang no id nuzudan e-kasih nga gisom baino au po izioho nakaanu sakadai hamin.
Ka disido, mantad po hamin nabanging saasabap no do hizud monigog di Tadau Koiso, paganakan nokogompit minizon di naamot id hamin puu paganakan.
Ka disido, boogizan Koupisan Kotundunan Mogiigizon, Koupisan Papas om Kopohuzungan (JPS) om Unit Buuan Kobuuon Layat (UPKR) Uvang Liawan nokoponoodo no kotombuhuzan di Tadau Koduvo.
|
