|
29th July, 2010
TAWAU: Songuhun koonduan kinoizonon kiumul 54 toun nasamaanan do nopujulan kiniopon kikotumbazaan do nopusakan, songian nasamaanan do poihokop om kinagasan duuduvo hongon id douvi.
Suvai mantad dino, kabang om todung disido kinagazan nogi minomoguno do kain, id hinominon disido id Kampung Rancangan Kalabakan.
Id suang kinantakan di Tadau Koduvo dino, koonduan i kosisian dino ointutunan mogiigizon sabaagi do Inai Yu, kikotumbazaan osonguhunan poguhui kinantakan tu savo om tanak disido minooi kalaja.
Ponovohi Huguan Pulis Uvang Tawau Supt. Imran Abdul Rahman minoboos, babaino diti nakapanaan izioho do duvo kusai miobpinai tuhun Indonesia, i nogi pakakalaja sinavaan disido kiumul 16 om 24 toun.
Tumanud disido duuduvo dioho tuhun Lombok om aiso do kointutunan dino, nagakom miampai kotuhungan tuhun kampung id Jeti Felda Umas ontok kumininam do mogidu om humavan pulis.
Asil kinapanaanan dino, boogizan pulis ka disido nakahantoi nokosoomo balang ngavi kigatang, iso’ tolifaun piovit-ovit om usin RM1,500 kikotumbazaan di nogompitan o sanganu.
Pinonoizukan kopoguhu duuduvo di natandasan minikot id Kalabakan di kuang hobi 3-4 tadau nakatahib, poguhui pinakalaja id gerai sinavaan di nogompitan.
“Baino mindad po tokou luputan tabaa patologi kokomoi nontodonon tootopot kinapatazon di nogompitan,” ka disido.
Kiis dino ka disido soizukon tumanud Seksyen 302 Kanun Koponinduahan, i manakadai ukum patazon mandatory nung kogompit kahasaan.
|
