Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
E_1
Voters returning from red zone told to undergo home quarantine |  Expected business distress post-moratorium manageable – CGC |  Upward trend in LI boost consumer, investor sentiment – Economists |  Mogigiyon noduhan manakau karan tu' koowit koligogonon |  Arthur Kurup poposili PRN di katatalib posunduran koinsonongan |  GRS minomihi di Hajiji sabaagi Vozoon Montili Sabah |  Majlis Kuliah Maghrib di Surau Ar-Rahman berlangsung cemerlang |  JBPM L-Datu ingatkan masyarakat jangan 'curi karan' |  Malaysia Airports tambah baik kemudahan saringan penumpang dari Sabah |  Kira-kira 32 pegawai dan anggota bomba di LD jalani ujian saringan COVID-19 |  Hajiji tokoh politik diyakini mampu bawa pembangunan Sabah |  Hajiji angkat sumpah Ketua Menteri baharu hari ini |  Peter drops bombshell |  Sarawak didn’t break any law to set up international schools – minister |  “Luk Chup” a popular dessert in Kota Bharu | 
 Kadazan Dusun

Kogogonopan, infrastruktur kakal kobolingkahangan tagayo

15th September, 2020

KOTA KINABALU: Kobolingkahangan kogogonopan om infrastruktur miagal do pangaba’ waig oborisi’, lotirik, talun-alun om kosigompoton piromutan ‘telekomunikasi’ kakal nosili ahal tosuul id Sabah.

Ahal dilo’ sasaru gunoon do mogisusuai bohogian kaampai no lansanon parti pulitik om mogigiyon kampung kosuul no id watas labus kakadayan.

Id kinolosuon dumontol Pomilian Tagayo Pogun (PRN) Sabah ko-16 do koompokon wulan diti, rayat Sabah kosuul no mogigiyon kampung mimang di kosili mongongobi rayat id watas diolo sompopori do manahak koposuulan montok monginsonong kogogonopan om infrastruktur do hilo.

Mogigiyon kampung minonondos do sundung kopotundaan haro pinoindalan id kinoiyonon diolo’, kakal ogumu’ kogogonopan i kikogunoon miagal do talun-alun notiir om piromutan telekomunikasi.

“Ounsikou yahai sabab di kaawagu diti, kampung dahai nakaramit piromutan Internet soira’ ‘pencawang’ telekomunikasi nopongo minomonsoi id watas kampung dahai nga’ kakal monugat kopotundaan suai miagal do talun-alun,” ka di Sinson Madamin i po nogi Molohingon Kampung id Pinahawaon, Inanam soira’ rinubaan Bernama di kaawagu diti.

Minoboros isio do alaid no mogigiyon lumansan mooi do talun-alun wonsoiyon matnad Kampung Pinahawaon kumaa Kampung Kionsom, i nogi poinsumpak id Inanam.

“Wawayaan dilo’ osuul kopio sabab kopogkikit ilo do timpu pamanahan. Nung owonsoi ralan diti, 30 gisom 40 minit do timpu i onuon mooi id kakadayan Inanam… noondo mogigiyon do hiti asansagan maya’ kakadayanKiulu omTamparuli do mooi id kakadayan Inanam toi Kota Kinabalu i pamanahan dilo’ maganu timpu duo toi tolu jam.

“Mantad dilo’, mokianu yahai mongongobi rayat i mongobi dahai id watas Lintuhun Koundangan Pogun (DUN) Inanam do kopoburu om kopogowit pokionuon dahai mooi do owonsoi ralan dilo’,” ka disio.

Minoboros i Sinson mogigiyon mikianu mooi do talun-alun dilo’ pointonod lobi 20 toun nga aiso’ kinotutukon.

“Kalansanan dahai calon i kalantoi id tindikohon DUN Inanam ototopot do monguhup om kiginawo rayat,” ka disio.

Naamot dilo, Molohingon Kampung Pinagon Baru id Kiulu i Martin Lotupas nopo nga minoboros do mogigiyon lumansan di mongongobi rayat opori om opoduli di kobolingkahangan i potoguang do rayat.

“Suai ko ilo’, lumansan yahai mongongobi rayat i haro id koporintaan sabab aiso’ kopotundaan i oowit kumaa kokompungan nung Puru Lintuhun Koundangan Pogun (ADUN) id bohogian pembangkang.

“Amu’ nodii yahai mimang do oiduanan kampung dahai id sunduk infrastruktur miampai kampung suai i obian do mongongobi rayat mantad koporintaan,” ka disio.-Bernama

   
Email Print