Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Sabah keluar arahan baharu tangani COVID-19 |  STA postpones AGM |  M-League faces long layoff - FAM |  Action teams to deliver food assistance to Tanjung Aru constituents |  Allow private sector to stop mandatory EPF contributions, calls MATTA |  COVID-19 death rate in Malaysia at only 1.1 per cent |  81 layat M'sia, puu paganakan mantad Itali nokoikot |  Popohuzung tuutulus polinta sakadai balang kogunaan |  Combining culinary skills with dietetics to promote healthy diets |  COVID-19: AirAsia group suspends most international flights |  Petrol retailers affected by weak fuel prices, MCO |  Adun Balung akan serah sumbangan pada golongan memerlukan |  K'jaan negeri teruskan hulur bantuan barangan keperluan harian kepada penduduk luar bandar: Peter |  Pemimpin akar umbi diminta sebar kesedaran patuh PKP di kalangan penduduk: Abidin |  JaPen Labuan perhebat IOW bersama agensi lain | 
 Kadazan Dusun

Misi koduvo Wuhan nakahantoi pinopoimbuhai pisokodungan

27th February, 2020

KUALA LUMPUR: Misi koduvo mogovit mahik layat Malaysia i au koguhi mantad Wuhan, China, avasi kinapapanaai om nahantoi mogovit mahik 66 tuhun mantad wilayah i noindamaan nogompitan miampai toluo COVID-19 id pogun dino.

Kinahantazan misi koduvo dino nopo nga asil pisokodungan mogisusuvai agensi polinta, vookon dino Komontilian Habus, Komontilian Kohidasan, Koupisan Bomba om Manampasi, Pulis Diraja Malaysia, Tinimungan Koumohigan Ginumuan om Koupisan Imigresen.

Misi Ponuhungan Kotundunan om Kantakan (HADR) dino kotimpuun miampai kapal poimbida AirAsia pougadan kumaa Wuhan mantad Gana Tutubpoon Kapal Kuala Lumpur 2 (Klia2) ontok di jam ko 5.58 minsosodopon Tadau Koduvo, om nokoikot id KLIA di jam ko 6.45 minsusuvab Tadau Kotohu miampai mogovit mahik 66 tuhun mantad dioho 46 tuhun Malaysia om 20 vagu nopo nga tonggungan (misasavo/tanak) dioho i okon mamasok.

Kinouhian dioho i mogiigizon id Wuhan, hongkod pogun pisompuuvan Hubei miampai uvang posoihi dioho songian au kahabus mantad no toluo COVID-19 i kihongkod id hongkod kakadazan, tinanud do 12 kru podtuhudan, sizam hahansanon agensi polinta mantad Malaysia om duvo upisol Hahansanon Tagazo Malaysia id Beijing.

“Polinta Malaysia kiangkab mamason kotohuadan au giigina kumaa saviavi boogizan i kogompit id suang mongintong misi sakadai kotuhungan mogovit mahik layat Malaysia om misasavo/tanak dioho diti avasi kapapanaai om saviavi atampasi koikot id pogun Malaysia,” tumanud Agensi Ponoinaan Kantakan Pogun (NADMA) id suang kointahangan di koniab.

NADMA nopo nga kopitanud misi HADR dino. Misi koiso HADR ontok di ko 4 Vuhan Koduvo nakahantoi mogovit mahik 107 layat Malaysia mantad dioho 88 layat Malaysia om 19 vagu misasavo miampai tanak dioho okon mamasok.

Suvai ko agensi polinta, duuduvo misin dino nga nakaanu pisokodungan Malaysia Airport Berhad (MAHB) om AirAsia. Tumanud NADMA, pionitan tavasi om pisokodungan di togiot piahatan polinta Malaysia om China nga nadadi panakadai kopoguhu kahantazan misi HADR dino.

Saviavi 66 tuhun i noovit mahik dino nakatahib panaasan kohidasan i tinoodo do polinta China poguhui dioho pinasaga do sumakai kapal.

Id timpuunon dino ginumu i nokolijisto miampai Hahansanon Malaysia id China nopo nga 75 tuhun, nga onom mantad dioho au nakatahib ponomolisaan kohidasan id gana tutubpoon kapal i tinoodo do polinta China.

Songuhun vagu kuminodong id saasabap do kohidasan au nokoikot id gana tutubpoon kapal, songuhun vagu au kaanu tu saasabap kalaja om songuhun vagu au kaanu momoduan do Wuhan tu kobohingkangan logistic, tumanud kointahangan dino.

Tumanud NADMA, ontok tuminubpo id KLIA izioho i minahik dino mazaa kopoinaan dekontaminasi poguhui noovit kuminaa Unit Taabo-abpo Tavan (ADU) montok panaasan kohidasan poguhui pootodon mahik kumaa Hongkod Pongintangan id Akademi Kopomuanan Balajalan Takavas (AKEPT) id Kakadazan Enstek, Negeri Sembilan montok kuarantin kihinaid do 14 tadau.

Id Hongkod Pongintangan dino, tinoina izioho pakalaja kohidasan mantad Komontilian Kohidasan om papanau poniisan kohidasan induvo sangadau montok mongintong dioho tootopot ohidas om pasagaon humabus mantad hongkod dino songian opupusan koponoinaan pongintangan.

“Id doiti pitubungan nopo nga kinuang kumaa pakalaja kohidasan no. Suvai ko pakalaja kohidasan aiso pitubungan miampai boogizan dahabus i pasagaon kaampai no puu paganakan.

“Mantad dino, puu paganakan toi ko tambahut pokionuon moi kaanu mamalati koozuzuvo diti om mositi manaak pisokodungan poimponu dino kumaa kapanadaan pongintangan diti. Montok angkab koumohigan, tampat diti tamangan do boogizan pulis,” ka do NADMA.

Izioho di katahib panaasan kohidasan pootodon mahik kumaa Hamin Pongusapan Tuanku Jaafar, Seremban miaga di pinatantu do Komontilian Kohidasan.

Agensi dino nga maamaso tumuubung paganakan tosomok montok popoiho koikatan layat Malaysia dino om manaak kointahangan kogompit koponoinaan pongintangan i mositi do vazaan.

Gisom di jam ko 8 minsusuvab koniab, kiis positif COVID-19 id Malaysia potindooi 22 tuhun om 20 tuhun navasi no. Bernama

   
Email Print