|
19th March, 2010
TAWAU: Mogigiyon id watas diti pinoingat do mogkikit kopomogunaan waig montok no do inumon om pogonsok.
I Puru Lintuhun Koundangan Pogun (Adun) Tanjung Batu i Datuk Hamisa Samat, minoboros koyuon pangaba’ waig i okuri’ om pagagadau do babaino’ diti kapabanta’ di mogigiyon do amu’ aganapan pangaba’ waig nung amu’ no mogkikit.
Suai mantad dilo’ pinokianu po nogi’ disio mogigiyon ngaawi’ do mongilag mantad kopontutudan poingukab.
Minoboros isio dilo’ di maso kuminakap om pinopoikid do waig id Kampung Kalabakan, doros hiti montok di 300 mogigiyon kampung i amu’ aganapan do waig.
Nokotindapou po nogi’ i Lansanon Mogigiyon om Unit Lansanon Komogoton Rayat (UPKR) Lintuhun Koundangan Pogun (DUN) Tanjung Batu.
Kohondot dilo’, nunsub disio o tinan Komitimonguasa’ Komogoton om Kotingoligan Kampung (JKKK) nogi’ molohingon kampung id DUN diti do maganu laang posodiaan monoguang mogisusuai waya’ diti pagagadau do babaino’.
“Id koyuon diti babaino’, ingkurian kopomogunaan waig,” ka disio i minokianu di tongo’ lalansanon nayatan kampung do toririmo popoingat di mogigiyon kampung diolo’.
Wokon nopo do waya’ diti pagagadau do babaino’ diti nga’ kinaasakan do waig id Bawang Tawau i nosili tadon poinbida’ pangaba’ waig id watas diti.
Watas nopo di suai nga’ Keningau om Tenom i nokopokito kinaasakan waig id Bawang Pegalan.
|
