|
|
|
Koozuzuvo vaig id ponougan nokotuun, mantad no koozuzuvo timpu magadau babaino.
|
19th March, 2010
NABAWAN: Kinavas vaig id bavang Panawan id ‘intake’ Koupisan Vaig id doiti nokotuun id kinavas 10 inci mantad 4 kaki mantad no pagagadau i tanau timpu diti.
Upisol Uvang Nabawan Bubudan O.T Majalu, minoboos, kinotuunan di okito kozo dino nontodon do ginumu kaganapan vaig id posoihi kakadazan nokuang gisom 50 piatus.
Ka disido, id koubasanan dino intake Koupisan Vaig uvang diti kaanu manaak vaig 900,000 gisom 1liter sangadau nga ontok timpu magadau diti kaanu manaak do 500,000 liter no.
“Mantad no kinotuunan kinavas vaig id bavang Panawan id kinavas di noindamaan ontok timpu diti, Koupisan Vaig id doiti asansagan papanau kalaja apat no jam montok monizob do vaig id intak id timpu totuvong om kalaja id ponougan kapanau 12 jam id timpu doungadau. Iti kilati do kapanaakan vaig papanaon nopo do 16 jam no sangadau,” ka disido kumiaa New Sabah Times ontok notuubungan id upis disido id doiti di Tadau Kotohu.
Sundung i do ingkaa ka disido, Koupisan Vaig nokotounda manaak do koponguangan kumaa mogiigizon id kakadazan Nabawan i momoguno kaganapan vaig mantad kohuzungan paip koupisan nung timpu magadau otihombus.
Naamot dino ka disido, Komiti kikuasa Koumbakan Sandad Uvang nokotimpuun papaatod do vaig id onom kampung id uvang diti.
Kampung ngavi nokogompit dino ka disido, Kg. Lima, Kg, Sarikan, Kg. kabangawong, Kg. Tetagas, Kg. Dua om Kg. Bahagian B.
“Kapataadan vaig diti toinaon do Komiti kikuasa Koumbakan Sandad Posoihi miampai kotuhungan pomiangkatan lori Koupisan Kalaja Pindahanan (JKR), Kounsol Uvang Nabawan (MDN) om noonombo padsakazan i toinaon do komiti kikuasa,” ka di Bubudan.
Bubudan i nogi Ponikoon Koumbakan Sandad Posoihi Uvang minoboos, sandad vaig suvai nointutunan no ino nopo nga bavang Langkukuk kuang hobi 20 kilometer mantad kakadazan Nabawan.
Ka disido, pomitanan vaig bavang dino naanu no do Koupisan Kohidasan montok pomolisaan nung atampasi gunoon toi id sambahik dino.
New Sabah Times i minonoodo do kotombuhuzan id piipio kampung id uvang diti noihaan dos aviavi mogiigizon momoguno do bavang Panawan montok mimpodu om momupu kain sundugn tu kinavas kabaakasan dino au ajamin.
Kinotombuhuzan nga noihaan kivaa mogiigizon i asansagan momiangkat vaig bavang dino montok kogunaan id daamin.
|
