|
19th March, 2010
KOTA KINABALU: Saviavi abaabazan koponutudan poingukab kaampai no montok angkab pomutamanan i pinasaga poguhui diti, pinotood naamot pinotimpuun tuutulus.
Potunud Koupisan Sandad Posoihi (JAS) Sabah, Abdul Razak Abdul Manap minoboos, haang dino montok modihin kantakan kotutudan mantad no koozuzuvo tavan i ahasu om nokoing i notoguvang pogun diti mantad po vuhan nakatahib.
“Sabaagi do haang miingat-ingat, mongodong tokou mahik kasagaan ponutudan poingukab montok angkab pomutanaman pinotimpuun tuutulus,” ka disido ontok notuubungan id doiti.
Minonugut isido kokomoi koozuzuvo tavan ahasu om nokoing i notoguvang pogun diti gisom nontodonon nantakan koinsavatan id suang kinantakan kotutudan kongungutan, pomutanaman om pias.
Minoboos i Abdul Razak, au miduvo o JAS maganu haang tokodou kumaa boogizan i au momoduli ponuuan dino.
Ka disido, sundung tu pambasaan Indeks Kozomutan Tongus (IPU) id kogumuan uvang kakal atampasi, koozuzuvo dino dati kadahin nugn koponutudan kakal poinlalad.
Minoboos siido, JAS nokotoimo do upalai montok monoodo ponutudan mantad mobubuvat id Keningau, Kota Belud, Ranau om Tuaran no, nga ino au pinasaga.
“Saasabap no dino mobubuvat au pasagaon monoodo haang id sambahik dino tu monoodo tokou pongintangan soosongian nopo,” ka disido.
Tumanud diisod, izioho i monoodo dino kavasa ontokon doh aang id siibo Seksyen 29A Akta Kualiti Sandad Posoihi 1974 om nung kogompit kahasaan adanda au katahib RM500,000 toi ko tolungku au katahib himo toun.
Minoboos i Abdul Razak, buuan id nazatan kampung nga pokionuon mooi manaak pisokodungan miampai poposogu kumaa boogizan kikuasa nung kosoomo misosonguhun i monoodo do ponutudan.
“Nokianu nogi tokou pisokodungan dioho (buuan id nazatan kampung) mooi mamason tanak ngavi tamangan dioho au monoodo ponutudan ontok timpu diti montok modihin kotutudan om hizud i kopogompit vinasi tongus,” ka disido.
|
