|
18th March, 2010
NABAWAN: Popomogot Mukim Nabawan i Ampulas Kaluhu minamason di tongo’ mogigiyon id watas diti do amu’ monginsada’d oid Bawang Panawan id timpu magadau diti montok mongilag dilo’ do ososomu’ om oinlabahan.
Ka disio, id timpu magadau diti Bawang Panawan nopo nga’ i iso’ no koiyonon do modju’ om momupu’ kain di tongo’ mogigiyon id Kampung Lima om pososorili’.
“Soira’ do olobou o waig bawang diti, amu’ nodi oguno ilo’ do podjuon,” ka disio kuminaa New Sabah Times, di maso rinubaan ontok minintong di kopoikidan waig id Kampung Lima, doros hiti di songkonihab.
Ka di Ampulas, koyuon do waig Bawang Panawan masak-asak nosusuhut diti pagagadau di anaru.
Naamot dino i Upisor Komogoton Mogigiyon (CDO) Nabawan i Barahim Andipoh, i minongoi intong doid pipiro kampung doid watas diti pinoposorou di tongo’ mogigiyon do mongilag mantad kopontutudan poingukab diti timpu magadau.
Ka disio, kopontutudan do mamaso magadau diti korosian do karalad om koponutud do tongo’ kabun.
“Miagal di timpu magadau di notoliban, kabun gata’ di mogigiyon do hiti nopunso do notutudan,” ka disio.
Minoboros isio do montok mongilag kotutudan sopiagal dilo’, kiguno mogigiyon do muringat om amu’ mimpontutud di kabun diolo’.
“Nung asansagan do montutud, potontuon do pointamong ilo’ suai ko’ magangat do koruhang manalob tapui di karalad,” ka disio.
|
