|
18th March, 2010
KUALA LUMPUR: Ko’au’an do pakakalajaan monoimo tinimungan tuhun au kadansaan (OKU) nakasabap do ogumu id tatanga dioho ao au nakaanu kalaja sundung tu kivaa kabaahan di kosudong, ka di Montili Kotundaan Koonduan, Paganakan om Mogigizon, Datuk Seri Shahrizat Abdul Jalil.
Minoboos zosido do mininggisom o boogizan dosido popotounda pinghudaan ngaavi di kosudong om kavavagu montok papavasa do tinimungan OKU monongkiahi, poingkuo po nga koimaan aiso pinusou do pakakalajaan pinopobuihit kozuzuvo.
“Noihaan mantad do pinghudaan di pinaanjul dotokou, ogumu pinghudaan di kavavagu po nga obuihit montok dioho kaanu kosivatan pakalajaan tu ogumu pakakalajaan do au opusou,” ka dosido di ontok minonimba tudizon pino’uang di Datuk Seri Mohd Zin Mohamed (BN-Sepang) id pitimbungakan Hintuun Layat, do doiti di koniab.
Aanangan i Mohd Zin do mokiiho nung pinghudaan di pinotounda do komontilian nokomoi kosudong miampai timpu kobobohan teknologi kopoihaan do baino diti i papavasa do OKU kaanu kosivatan pakalajaan di hobi anavau.
Minoboos i Shahrizat do kotoguvang nogi o boogizan dosido do kobohingkaangan montok manaak kotumbazaan do Boogizan Kokuasaan Kinoizonon (PBT) do popotounda koumatan montok OKU id hivang ngaavi tuhun ginumuan.
“Ogumu o layat nung nohodi izioho okon ko sabaagi OKU, momusoou izioho do au tagal montok manakadai do OKU. Nohiivan dioho do sosongian noopo timpu, miho adadi izioho do OKU,” ka dosido.
Kumaa doid tudizo pino’uang do Datuk Ibrahim Ali (Bebas-Pasir Mas) i kumaandak mokiiho nung kivaa pisuvazan sakadai di toimoon do OKU di nopihadsa mantad kohodi po om nopihadsa di kahapas noimaan kohigaganan, minoboos i Shahrizat do tompuanon izioho do isooi.
Kokomoi pambalazan pinsin kumaa OKU, minoboos zosido do babaino diti, aiso po gaab do kopolintaan montok papaanjul dino.
Di poguhui suminimba tudizo sandad di Mohd Zin kokomoi pamalanan timpu tanau om timpu tonibo do komontilian montok manakadai do OKU mimpaagat, minoboos i Shahrizat do vookon haang di poonjulon nopo nga manaak elaun pakakalaja nopihadsa soginumu RM300 sombuhan, om popotounda sakadai ponimpuunan soginumu RM2,700 songuhun montok mongunsub dioho do mongindapu tonini.
“Suvai diho, popotounda nogi o komontilian do abaabazan Pononduhian Id Suang Komuniti, kouhanan tambang sapalu gatang montok padsakazan tuhun ginumuan di pointantu om popotounda skim sakadai kumaa do tinimungan OKU di au koimau kumalaja om au koimau monoinav sondii dioho,” ka dosido.
|
