|
17th March, 2010
KENINGAU: Kinoponomponan pipiro komponi pomukobunan sigup id watas diti amu’ nokopomiraag do nindopuan di tongo’ mongingindapu’ sigup noorib i madadagang doid kaki-kaki lima, do hiti.
Songulun mongingindapu’ i mokimointutunan nopo do i Inan Masirah, 61, minoboros do amu’ yau nokotoguang korugian id nindopuan dau.
Ka di Inan Masirah, kaanu yolo’ do pangaba’ mantad labus kopitamangan do komponi om ilo’ pogi’ do aiso’ waya’ dilo’ kumaa di kopongindopuan diolo’ do potitikid tadau.
Kapadagangan sigup noorib id watas diti nokotimpuun pointonod podi toun 60-an, nokotimpuun miampai sorokoro’-koro’ i kapaampai no do duo gisom tolu tulun.
Poingkuro po, babaino’ diti nokoinggayo ilo’ om nokopokito do sokukuri’ 30 gisom 40 mongingindapu’ sigup noorib nakaramit koundaran mantad dilo’.
Miampai do momorinut di kolimpuunon toun diti, komponi pomukobunan sigup id poliliput watas ponong sokid minonompon do kotorinaan diolo’ nosusuhut kinokusutan do ikonomi pomogunan i nokopotonggoi po nogi’ di komponi ngaawi’ diolo’.
Komponi ngaawi’ nokomoi minomili’ do mongukab kotorinaan id pogun-pogun i kapalabus kos kukumaraja’ om kotorinaan di osiriba’, miagal do Thailand, Filipina om Indonesia.
Naamot dino, songulun bagas manananom sigup i Hasmah Mairin, pinopoilo do di nopo kolimpuunon kinoponomponan kotorinaan dilo’ nga’ okito ilo’ do kapanahak waya’ kumaa di kuasa’ momoli di tongo’ bagas manananom, poingkuro po kinoinsawaton do gatang gata’ nokoponoibau do katangaban dilo’.
“Pipiro no minggu’ dahai do nokotoguang kinosusaon,” ka disio pinopointalang.
Montok nodi tongo’ mongingindapu’ id kaki lima, kinoponomponan do kotorinaan kilang nakapanahak koundaran kumaa diolo’.
“Yahai nopo nga’ papadadagang no do sigup do hiti om tantu’ no do yahai o rikoton di tongo’ moninigup koubasanan,” ka di songulun papadadagang dilo’ i Asma, 57.
Sigup noorib nopo nga’ kororohian di moninigup doun koubasanan i momolopian nogi’ ombudon.
Manananom yolo’ do sigup montok kapadagangan saalom om i nopo wokon dilo’ nga’ poudaron kumaa pogun sombol, Brunei Darussalam.
Pinopoilo i Asma do pointonod kinoponomponan komponi sigup do hilo’, kopokionuan do sigup id watas diti nokoinsawat.
“Kaanu yahai do gisom RM500 sangadau,” ka disio i pinopoilo do somoonu’ amu’ kogonop o sigup noorib dilo’.
Keningau nopo nga’ nointutunan po nogi’ do songinan mantad watas id pogun diti i papalabus sigup noorib di tongosonong.
|
