|
17th March, 2010
KENINGAU: Kinapatazon di Jovy Joe John Lo, 16, i nohonod id Bavang Pegalan, di kuang hobi jaam ko 5 minsosodop di tadau Koiso nakatahib, kinomoi do paganakan sabaagi iso kinaantakan konosipan.
Tadi disido, i Josephine Lo, 15, pinopoiho do minonuat i tobpinai kusai totuo dosido do suat poinsusuvai id ‘wall paper’ tilifon piovit-ovit di komozon dosido do kikoimaan isido di moninsuk kopiumanan.
“If I die tomorrow, what will you say me today??”.
Iti no i tinimpoon di aka ku om izikoi songkohominan au kaanu mamalati suang dino,” ka di Josephine.
Tumanud do susumikul pangan takavas kotohu diho, nopiumanan di aka dosido do kotongkiazadan disido miampai poinsoou.
Susumikul pangan takavas kaapat id SM Ken Hwa diti nopo nga songuhun di osuau om aiso tambahut tondu, id sampaping do au insan mongomu toi pinopoimbuhai kopiumanan kakausan miampai do paganakan.
Poingizon i munggui miampai di tina dioho id pomuhaminan Taman Bersatu, naamot di tama dioho nopo nga poingkalaja id iso kem kazu balak id Telupid, Sandakan. Nokoikot isido (tama dioho) di sodop songkoniab om nokosivat do minumpazat doid kalaja mogium tinan di tanak disido id kinoizonon di au songkuo osodu mantad nizonon dioho.
Tumanud do pulis, noiduan pinuobo i munggui do nohonod id bavang nokomoi di kahapas minagapon do sosongohun di ontok tadau Koiso.
Munggui, i tomoimo mugad id bavang nokomoi montok abaabazan kololoizan miaga do magapon miampai tambahut ngaavi, nga ontok tadau kinaantakan, minugad isido do sosonguhun.
Bavang Pegalan diho nopo nga id kinoizonon piipio no meter mantad hamin nizonon dioho.
Nosoomo o tinan di munggui opod no meter mantad pinoduan disido di jaam ko 8 doungosuvab di tadau koniab,” ka di Huguan Pulis Uvang Keningau, i DSP Zahari Mohamed om noimagon do Hamin Pongusapan Keningau o nontodonon kinapatazon do munggui nopo nga nohonod.
Minoboos i Zahari do sundung tu kozuzuvo do bavang di oibau no ontok timpu magadau, poingkuo po nga posoovon do mohoing mooi do au popohogos tanak ngaavi dioho do mimpodu miampai sosongohun.
“Kohigaganan o bavang kumaa doid dazanak,” ka disido doid iso kopoihaan id piniboosan.
|
