|
17th March, 2010
TAWAU: Nakapanaan o pulis apat komuhakan kusai kiumul piahatan 19 om 23 toun montok monuhung koponoizukan kokomoi kiis minanambana om minagaau pinopoompit do duvo koonduan kiumul do 19 om 30 toun, di ko 9 Vuhan Kotohu nakatahib.
Huguan Pulis Uvang Tawau ACP Ibrahim Chin minoboos, saviavi di natandasan kikotumbazaan minonoodo kinantakan dino di ko 6 Vuhan Kotohu 2010, kuang hobi jam ko 1.00 minsusuvab id uvang hivang tokodoit id uvang diti.
Tumanud disido, ontok tadau dino duuduvo di nogompitan maamaso id pamanaan mahik mantad iso hongkod kololoizan id uvang Fajar ino nopo nga kahapas tuminindapou do lamai tadau kinohodion id hongkod kololoizan dino.
Minonigog ka disido, iso padsakazan kavo Kembara mininsomok duuduvo di nogompitan om duvo kusai kahapas dino huminabus poguhui minononsog duuduvo di nogompitan suminuang padsakazan dino.
Duuduvo di nogompitan ka disido kahapas dino noovit id iso uvang tokodoit. Kahapas dino, kaapat-apat kusai dino minanambana duuduvo di nogompitan ino nopo nga duvo di natandasan kusai montok potitikid di nogompitan.
Tolifaun piovit-ovit duuduvo di nogompitan ka disido, pinanakau id suang kinantakan dino.
“Saviavi di nogompitan dino babaino soizukon tumanud Seksyen 376 Kanun Koponinduahan montok kahasaan minanambana om Seksyen 395/397 kanun di miaga montok kahasaan minagaau,” ka disido.
Id suang ahal kogompit, mamason I Ibrahim mohoingon mooi do tomoimo mintamong kapapanaai tanak ngavi dioho om mongintong dioho au humabus gisom pitanga sondop montok modihin antakan nuununu kantakan di au osoou.
Naamot dino id suang kobuuon misuvai, pinopoiho isido do ontok di ko 13 Vuhan Kotohu nakatahib, boogizan disido nga nakapanaan 36 tuhun songkosuvazan tu noihaan do aiso nuununu suat kointutunan.
Saviavi dioho ka disido tinaan id posoihi uvang diti om ontokon haang id siibo Akta Imigresen.
|
