|
16th March, 2010
KAWANG: Komuniti Bestari kitinonggungan tagayo doid kapatahakan kopointalangan di otopot, kopunong om kiwaya’ kokomoi do nimpohon koporintaan kumaa rayat id nayatan siriba’.
I Puru Parlimen Papar Datuk Rosnah Abdul Rashid Shirlin, minoboros do Komuniti Bestari nga’ kiguno po nogi’ do osoding di kinaantakan id pososorili’ mooi do kopongilag di totondos mantad bohogian aiso’ tinonggungan i kopomiraag do kotoronongon.
Isio i po nogi’ Kumoduo Montiri Kolidasan Malaysia minoboros dilo’ di maso pinopoimagon do Ababayan Info Bestari Komuniti Bestari Mukim Kawang i pinisokodungan papaanjur do Koupisan Kopointalangan om Kounsol Kotingoligan Pogun id Lintuhun Ogumu’guno Kampung Kawang do hiti di songkonihab.
Ka di Rosnah, ababayan dilo’ kopogirot po do sunduan piobpinoian om koponokodung do koponigampotan angkab 1Malaysia doid sompipi’ puru Komuniti Bestari nogi’ mogigiyon kampung id kapalantaion do ababayan nokomoi.
Nokopogulu dilo’ i Mongunguhup Potunud Bohogian Media om Piromutan Korporat i Materi Olod id boboroson disio, minoboros do tinonggungan dilo’ kopiongoi po nogi’ di rikoton kinoponuridangan Komuniti Bestari sabaagi tinimungan mogigiyon i papasasad do kopointalangan id nayatan siriba’.
Ka di Materi, ababayan Info Bestari nopo nga’ kaampaian di puru Komuniti Bestari doid kopoindalanan ababayan nogi’ mongimbulai do sunduan pisompuruan doid puru om mogigiyon kosuul no id pinggisaman monguhup koporintaan mamagamot angkab 1Malaysia nogi’ manahak kopointalangan kokomoi di ahal kinaantakan kaawagu.
Ababayan sangadau dilo’ do wokon sinuangan do mogisusuai ababayan kaampai no senamrobik, panambarasan, sipoot raramai om pomorisaan kolidasan aiso’ kabayar.
Wokon do koupisan i mianganu bohogian nopo nga’ Komontirian Pidagangan Suang Pogun om Ahal Koponggunaan, Koupisan Kolidasan, Suruhanjaya Pomilian Tagayo (SPR) om Longkod Kapagantaban Kotogian Narkotik (Puspen).
I nopo nokotindapou nga’ i Upisor Watas Papar i Iman Ali, Monunurat Tolisok Totuo Kumoduo Montiri Kolidasan i Sharifah Nazirah Syed Basir, Monunurat Tolisok Kumoduo Montiri Kolidasan i Hadi Kassim, Upisor Kopointalangan Watas Papar i Masrof Yaacob, Upisor Piromutan Parlimen Papar i Talib Rahim om i Ponorikohon Komuniti Bestari Mukim Kawang i Mohd Amin Kadir.
|
