|
16th March, 2010
KUALA LUMPUR: Minonuu di koniab i Yang di-Pertuan Agong Tuanku Mizan Zainal Abidin do savi avi buuan id pomogunan Malaysia diti mooi do tumanud koimaan di Huguan Montili, Datuk Seri najib Tun Razak, i koduumak mindai id gana minsomok do layat montok mamalati kobohingkaangan dioho.
Minoboos i Seri Paduka mantad di koigitan di Najib o pomolintaan, nakaanu isido do pinapapanau mogisusuvai abaabazan montok popoingkavas kosindakon do layat.
“Mamason zou kounsikaan kumaa di Huguan Montili om nuzudan Montili disido tu mantad di 11 vuhan nakatahib, tu kopolintaan ku id siibo buu’anon di Huguan Montili nakahantoi pinapapanau mogisusuvai abaabazan montok popoingkavas kosindakon do layat.
“Mositi no o buuan ngaavi momit di Huguan Montili miampai mindai id gana montok monginsomok do layat montok mamalati miampai hobi sinomok do kobohingkaangan dioho om popogit pionitan di poindoos miampai layat id savi avi nazatan,” ka di baginda di ontok pinopoimagon pangan kotohu Parlimen ko-12 do doiti.
Potindapou nogi Raja Permaisuri Agong Tuanku Nur Zahirah id adat nokomoi.
Iti nopo nga di koinsan nogi di Tuanku Mizan do pinopohombus pason mantad po di Najib nadadi do Huguan Montili koonom.
Minoboos i Seri Paduka do avasi koponoimaan disido do angkab 1Malaysia, Layat Poguhuonon, Kahantazan Kumoiso, i mipahud do Koundangan Pisompuuvan.
Pinapatantu o pomolintaan ku do onom Kaganaan Asil Tagazo Nasional toi NKRA di mositi hantazon, iho nopo nga papahaab akses kumaa doid balajalan kivaa kualiti om kikomauan, momo’uang vinasi padsakazan tuhun ginumuan, manangod ponuapan, mongingkudi gontob kahasaan tavagat, papavakas koumatan habus kakadazan om sokid om nogi popoingkavas ningkokoton koposizon do layat di kikoonuan tosiibo,” ka di baginda.
Minongomoi nogi i Tuanku Mizan do Palan Hala Tuju Abaabazan Transformasi Kopolintaan di pinotimpuun di ko 28 vuhan Koiso nakatahib sabaagi iso abaabazan di katama.
“Ousikou zou do avasi koponoimaan do layat doid kogompitan gnaavi do kopolintaan diho.
“Mositi no o layat do mikabai bahazan songovian do kopolintaan ku mooi o Abaabazan Transformasi Kopolintaan do ahantoi papanaon,” ka di baginda.
|
