|
16th March, 2010
KOTA KINABALU: Montili Kotundaan Mogiigizon om Ahal Momoguno Datuk Azizah Mohd Dun mokianu boogizan kikuasa popogiot kapanamangan hoohobi no kozo id vavazaan ngavi sumuang kopoguhu gana tutubpoon kapal montok modihin kapaganakan dadah mantad dahabus pogun kosuang pogun diti.
Minoboos isido, kapanamangan togiot miampai misin pongintutun dino kiguno montok manahob kosuangan dadah id pogun diti.
“Pongkimamaan diti mositi potimpuunon id gana tutubpoon tomuula Gana Tutubpoon Terminal 2 Kota Kinabalu i kikotumbazaan dinadi do tumbazaon do dudumagang dadah montok mogovit sumuang dadah kumaa Sabah,” ka disido.
Minoboos isido dino ontok minomuuan Mitingan Komiti kikuasa Koponoinaan Pemadam Pogun Sabah Bil.1/2010 id Dewan Pitimbungakan, Wisma Tun Fuad Stephen, id doiti, di koniab.
Nokotindapou nogi, hahansanon ngavi mantad Agensi Anti Dadah Kabangsaan (AADK), Pulis Diraja Malaysia (PDRM), Kastam, Koupisan Balaalan, Koupisan Kotoinaan Kotundunan Am Sabah om ponikoon ngavi Pemadam id pototongkop Sabah.
Azizah i nogi Ponikoon Pemadam Pogun minoboos, kobohingkangan kapatazadan dadah oindamaan kozo om momoguno pisokodungan saviavi boogizan montok monguhan dino.
“Saviavi boogizan mositi misokodung monuhung boogizan kikuasa mamagakom dudumagang i momoguno mogisusuvai lahan,” ka disido.
Ka vagu disido, Pemadam kivaa do abaabazan kavavagu ino nopo nga ponongkusan “Abaabazan Rakyat 1Malaysia Sihat Tanpa Dadah” i ozuvon id Beaufort ontok ko 24 Vuhan Kaapat diti, Kota Belud (24 Vuhan Kotuu) om Lahad Datu ontok ko 9 Vuhan Koopod diti.
Monuu i Azizah mooi buuan ngavi mogiigizon hoohobi no kozo hahansanon ngavi layat manaak sokodung kumaa Pemadam id suang pongkimamaan popogiot kasaavan id tinimungan mogiigizon ginumuan kokomoi kohigaganan dadah.
|
