|
15th March, 2010
MIRI: Koupisan Kopointalangan nokokito do rayat koinsanai koilo di kinohoroon do Angkab 1Malaysia nga’ kakal do amu’ karati poinponu’ di konsep dilo’, ka di Luguan Potunud Kopointalangan i Datuk Abdullah Morad do hiti, konihab.
Tumanud pinonoriukan di winonsoi do koupisan dilo’ di kaawagu diti nokoilo do 80 pihatus matnad rayat pogun diti nokoilo kokomoi 1Malaysia nga’ kopointalangan diolo’ amu’ kopokito korotion poinponu’ kokomoi suang do angkab dilo’.
“Mantad dilo’, toun diti tilombuson tokou pinggisaman manahak kopointalangan kokomoi konsep 1Malaysia om poingkuro rayat mantad potitikid nayatan mogigiyon karati dilo’ do poinralom,” ka disio.
Minoboros isio dilo’ id kinopoimaganan do Ababayan Sepakat Bestari Parlimen Miri pinaanjur do Komuniti Bestari Kampung Pulau Melayu do hiti.
I Puru Lintuhun Koundangan Pogun Sarawak watas Pujut, i Andy Chia, minongobi’ di Puru Parlimen Miri i Datuk Seri Peter Chin Fah Kui i po nogi’ Montiri Ginoris, Tiknologi Otomou om Waig pinopoimagon ababayan nokomoi.
Tumanud di Abdullah, ginoris mantad Komuniti Bestari i noobian di mogigiyon id nayatan siriba’ maan gunoo’ montok monguhup koupisan disio id kopoindalanan pinggisaman popointalang konsep 1Malaysia nogi’ tongo’ nimpohon koporintaan di suai.
|
