|
15th March, 2010
PETALING JAYA: Popointutun o kopolintaan do skim pinsin pakalaja sondii om koumulan mohoing, dati do ontok piintangan toun tiiso id siibo konsep kopolintaan tobingupus, ka di Montili Ontodonon Tuhun, i Datuk Dr S. Subramaniam.
Minoboos isido do nonuan tonggungan o Kotinanan Koumohigan Sosial (Perkeso) montok papapanau ponoihian aktuari kokomoi duvo skim diho poguhui do poonjulon ino.
“Mamaso zikoi id proses popointutun tozibut kopotingkodan montok pakakalaja kaganaan swasta,” ka disido kuminaa doid monunuat abal di kahapas pinapataak sijil kuminaa doid 80 koonduan di minomupus kursus pinghudaan kabaahan di pinaanjul do komontilian do doiti di koniab.
Kokomoi atag kousinan pinsin koumulan nohoing, minoboos i Dr Subramaniam do mositi o Perkeso do papatantu umul minimum om timpu pambalazan montok do popoposuang (pencarum) ngaavi dino.
Montok skim koumohigan poimbida sosial montok dioho di pakalaja sondii nga au monuang miampai id Perkeso, minoboos isido do mositi o ponoihian poimatu do poonjulon tu iho nopo nga kopogompit ahal miaga do hivang om timpu kumalaja.
“Ogumu mantad dioho di pakalaja sondii do kumalaja id suang timpu di tanau om au kumalaja id iso kinoizonon di pointantu. Dadi mositi tokou monoihi do ahal diti,” ka disido.
Minoboos i Dr Subramaniam do mamaso do baino o komontilian disido id proses monoodo iso draf kokomoi duuduvo skim pinsin di kavavagu diti montok pobuzuon kumaa id kabinet montok kahantazan.
“Skim diti mositi pointihombus. Miampai diho, ogumu proses kogompit, kaampai no kopoobian kousinan om papadahin piipio akta di apatut,” ka disido.
Ka disido, gab do kopolintaan nopo nga montok mongiho kozo do pakakalaja kaganaan swasta do kopiumon kounalan pinsin di isooi miampai do tambahut id kotoinaan polinta.
Minoboos i Dr Subramaniam do monongkiboos isido miampai di Huguan Montili om Montili Kousinan, i Datuk Seri Najib Tun Razak montok popoobi kousinan po’uangon kumaa doid komontilian montok monimpuun abaabazan vagu, hobi no montok koonduan id uvang kakadazan do toun diti.
|
