|
15th March, 2010
KUALA LUMPUR: Pokionuo o tuhun ginumuan mooi do au ouhan otumbazaan kumaa doid abal tongus kokomoi koinsavaton gatang tumau om nogi bakaang kaganapan di potongkopon do piipio boogizan.
Minoboos i Montili Pidagangan Suang Pogun, Kopolitif om Kopomogunaan (KPDNKK), i Datuk Ismail Sabri Yaakob do sahagi do aiso nuununu kopoihaan minaan do kopolintaan kokomoi koinsavaton gatang o tumau toi kakamot kagaganapan, kavasa o tuhun ginumuan mongomoi diho sabaagi ‘spekulasi’ sababaa.
“Kokomoi gatang tumau, gisom baino diti, aiso kinopoihaan kokomoi nuununu koinsavaton. Di vuhan nakatahib nga mimboos o tuhun ginumuan do minsavat gatang tumau, nga au po nokoinsavat. Di vuhan nakatahib nga mimboos o tuhun ginumuan do ogumu bakaang minsavat gatang, nga kakaal au nokoinsavat.
“Aanangan zou popoiho kumaa doid layat, sahagi do aiso kopoihaan do kopolintaan montok nunu noopo koinsavaton, iho nopo nga ‘spekulasi’ noopo,” ka disido kuminaa doid monunuat abal di kahapas pinopoimagon Tadau Miampai Momomoguno Uvang Puchong, id Taman Puchong Indah, somok doiti di koniab.
Minoboos isido do abal tongus miaga diti nopo nga somoonu kaanu popoimbuhai kozuzuvo katangkangaan, hobi no id tatanga do momomoguno, naamot do kivaa pamajakan om kukumadai do maganu kosivatn montok mamabut kountungan.
Naamot diho, minoboos i Ismail Sabri do kopiondot Tadau Kopotutan Momomoguno Sompomogunan, do tadau banino i kinuhuvan do “Usin Dotokou, Kopotutan Dotokou”., posoovon o tuhun ginumuan mooi do mambalanja usin dioho miampai lahan di pointunud om au osuvak doid ahal di aiso kounalan.
Di poguhui diho id pason disido, minoboos i Ismail Sabri do tumanud ponoihian di pinaanjul do komontilian nokomoi, noihaan o gontob kopipiumanan do momomoguno kumaa doid kopotutan dioho id pomogunan Malaysia diti do kakaal id gontob di tosiibo, iho nopo nga 58 piatus no.
|
