|
14th March, 2010
KUALA LUMPUR: Mositi o susumikul di kumaandak mongoput balajalan dioho id institiut ponginobosan takavas swasta (IPTS) do mongiho kozo gontob ponginobosan id institiusi nokomoi do kivaa kualiti.
Minoboos i Kumoduvo Montili Ponginobosan Takavas, i Datuk Saifuddin Abdullan do mositi izioho popoguhun ahal kursus toi pinghudaan di pataakon, pensyarah om koumatan di pinotounda do IPTS diho montok mongivad mantad kopnoodo kosilapan.
“Mositi ihoon kozo dioho o kualiti, okon ko mombii noopo doid hinominon, tu kivaa institiusi do hinominon dino do au songkuo oginongo nga manaak pinghudaan ngaavi di kivaa kualiti,” ka disido kuminaa doid monunuat abal di kahapas pinopoimagon do Pokikitanan Balajalan Facom, do doiti di koniab.
Minoboos isido do mositi nogi o susumikul om mohoing dioho do tumindapou id pokikitanan ngaavi balajalan montok mongintutun om montok koonuan kopoihaan kokomoi institiusi om pinghudaan di dodizon pihi.
“Pokikitanan miaga diti nopo nga kiguno kozo om kosokodung o komontilian doid pinggisoman diti tu mositi popotounda tokou do mogisusuvai pomihian montok susumikul do mongoput balajalan,” ka disido.
Naamot diho, minoboos i Saifuddin do popoiho o komontilian id suang timpu tosomok do ginumu totopot kinoizonon di kivaa id institiut ponginobosan takavas polinta (IPTA) montok suangan do toun diti.
Minoboos i Poniikon Facon Exhibitions Sdn Bhd, i Tan Sri Yahaya Ibrahim do kivaa hobi 600 institiut om hahansanon ponginobosan takavas mantad suang om habus pogun minumpazat doid pokikitanan nokomoi, kaampai no Berjaya University College of Hospitallity, Brickfields Asia College, Help University College, International University College, Nanyang Techological University om University of Singapore.
“Otumbazaan zikoi do kopoihaan di naanu mantad pokikitanan diti do kapanakadai dioho monoodo pomihian tavasi kozo montok mongoput balajalan,” ka disido.
Pinoposoou nogi isido do momimiombo do mogovit kinoputusan panaasan om dokumen di kosudong montok koonuan pombiian di koontok songian sumoomo do kaunselor om hahansanon IPTS, id sampaping do mongupalai sikulasip om pagahasan balajalan di pataakon do IPTS.
Pokikitanan diho nopo nga poonjulon nogi id 11 kakadazan do suvai id pototongkop pomogunan Malaysia, kaampai no Alor Setarm, Pulau Pinang, Johor Baharu, Kuching om Kota Kinabalu.
Pokikitanan duvo tadau di nokotimpuun di koniab diti nopo nga pinaanjul id Kuala Lumpur Convention Centre (KLCC), om montok koonuan kopoihaan kotihombusan kokomoi diho, kavasa o tuhun ginumuan do umonit id laman web www.faconex.com.
|
