|
14th March, 2010
KOTA KINABALU: Soginumu 34,252 layat Brunei do tuminombuhui id pogun Sabah diti di toun nakatahib om pisosoomo o ginumu diho do koinsavat do toun diti miampai kivaa diho kotuhudan tikid tadau mantad pomogunan Brunei kumaa Sabah.
Minoboos i Montili Kotombuhuzan, Koubasanan om Sandad Posoihi, i Datuk Masidi Manjun do ginumu koikatan tutumombuhui nopo nga pisosoomo do o’uangan miampai kivaa diho kotohudan tikid tadau i pinotounda do Royal Brunei Airlines om AirAsia mantad Brunei kumaa Kota Kinabalu.
Suvai ko iho ka disido, layat mantad Brunei nga kavasa nogi sumuang do Sabah momoguno feri maza lolokiton toi jeti Menumbok om lahan dinda di okito do kaanangan kozo id tatanga do layat pomogunan nokomoi montok mombo do doiti.
“Ahansan tokou do kaanu mamagazat hobi ginumu tutumombuhui mantad Brunei miampai kivaa diho koumatan hongkod pomomohizan di kiningkokoton vinoun di Sabah.
“Pinopokito o layat Brunei do kaanangan di taahom montok momoomohi id pogun Sabah diti, hobi no do baino tu kivaa dotokou do 1Borneo om Suria Sabah di tumoina poimponu do au no ahaid,” ka disido.
Noboos disido iti di ontok pinopohombus pason id abaabazan pangangakan sodop songovian do Huguan ngaavi Hahansanon om Diplomat Habus Pogun id Brunei Darussalam id Sabah, id iso hutil nointutunan do doiti di sodop tadau Kohimo.
Pason disido diho nopo nga pinohombus di Panadakai Montili Kotombuhuzan, Koubasanan om Sandad Posoihi, i Datuk Bolkiah Ismail.
Minoboos i Masidi do Sabah nopo nga vookon pogun di kivaa kogingahan om tiikoton togumu do kotombuhuzan di pointantu no kaanu mamagazat ginavo do tutumombuhui ngaavi mantad suang om habus pomogunan diti.
“Vinakas tagazo dotokou nopo nga poinvihiu id kotahunan asam di kinumpaasan notusan toun, pulou ngaavi di kagazat, pononduhian sanktuari mamaamasi suang tahung kiningkokoton vinoun om tungkus koubasanan,” ka disido.
Id pangangakan diho, hiniis nogi o diplomat ngaavi miampai mogisusuvai sazau koubasanan suku tinau id Sabah, kaampai no sazau Sumazau, Igal-Igal, Mogunatip om Mongigol.
Suvai ko iho, pinokito nogi do tombuhui ngaavi do kinoizonon ngaavi gondoon tutumombuhui di kagazat di kivaa id pogun diti.
Potindopou nogi doid abaabazan diho i Poniikon Kotinanan Kotombuhuzan Sabah, i Datuk Seri Tnegku Zainal Adlin om i kumoduvo disido, i Datuk Sari Suhut.
|
