|
14th March, 2010
TUARAN: Kopolintaan pogun Perak mimang do minsingiho koinsamakan i kahantoi papantod pihumaagan layat mogisusuvait inau om agama mantad Sabah, ka di Montili Tagazo Datuk Seri Dr Zamry Abdul Kadir.
Minoboos isido Perak kivaa layat mogisusuvai tinau om agama miaga id Sabah om mimang do popiiso layat dino miampai kahantoi mooi kaanu monoodo projik ngavi kotundaan miampai tavavasi.
“Nung mimang tokou mongintong id boogizan poingkuo poingkuo pihumaagan todoon, hoohobi no kozo id suang boogizan Barisan Nasional om Umno, mongintong tokou poingkuo buuan ngavi id Sabah kaanu popoimbuhai vinakas dino.
“Pilotian i pinokito do saviavi tinau i kivaa id Sabah avasi kozo, saasau izioho mogilalati.
“Suvai mantad dino, Sabah nga kaanu manaak kounsuban kumaa boogizan kotundaan, popoinsodu ahal ngavi i dati koovit do aiso kasanangan kumaa layat… iti no koinsamakan i tavasi kozo id siibo kopomuanan Sabah i kivaa,” ka disido kuminaa magaganu abal kahapas pinopoimagon Lamai Pitabangan 1Malaysia Umno id Tuaran id Kampung Gayang id doiti di koniab.
Songian noudizo nung Umno Perak adadi mohoing kusai gumompi kumaa boogizan ngavi Umno suvai id Sabah, Zamry, i nogi puu Kounsol Takavas Umno om mohoing kusai kumaa Umno Tuaran, minoboos Umno Perak aiso kaantaban montok monoodo dino.
“Id ikoton dino, montok dogo sondii nokopongintutun zou tambahut ku mantad Sabah mantad po di omuhok po.
“Nung pokionuon toou montok hobi mogilalati miampai ogumu vagu boogizan id Sabah, aiso kaantaban montok dogo,” ka disido.
Id lamai dino, Zamry miampai Montili Kopolintaan Kinoizonon om Pomuhominan Pogun Datuk Hajiji Noor, i nogi Huguan Umno Tuaran, minumpazat pitabangan kapanadaan Mosogit Nurul Ikhwan i naampazat mogiigizon kampung dino.
|
