|
12th March, 2010
KOTA KINABALU: Pinapavasa o Boogizan Kokuasaan Kinoizonon (PBT) do Paanakan toi Geran Tounan 2010 soginumu RM34.5 lizong montok 22 uvang PBT id pogun Sabah diti.
Minoboos i Kumoduvo Montili Pomuhaminan om Kopolintaan Kinoizonon Malaysia, i Datuk Seri Haji Lajim Haji Ukin do mantad ginumu diho, nakaanu o Kounsol Uvang Beaufort fo RM922,120.51, Kuala Penyu (RM402,000) om Sipitang (RM560,623.34).
Ka disido, di toun diti, nokotoimo o PBT do kopoobian mantad Kopolintaan Pisompuuvan miampai piadasan do RM1.5 lizong, naamot do RM595,000 nopo ng pobuzuon kumaa doid Abaabazan Kabaakasan om Local Agenda id nazatan PBT id pototongkop Sabah.
Minoboos isido diti di ontok pinopohombus pason pinopoimagon Abaabazan Tuminau do puu ngaavi Kounsol Uvang Beaufort, Kuala Penyu om Sipitan id iso hutil nointutunan do doiti di koniab.
Potindapou nogi doid abaabazan tuminau diho i Panakadai Montili Kopolintaan Kinoizonon om Pomuhaminan, i Datuk Ghulam Haidar Khan, Puu Parlimen Sipitang, i Datuk Sapawi Haji Ahmad, Puu Hintuun Koundangan Pogun (Adun) Lumadan, i Kamarlin Haji Ombi, Adun Kuala Penyu, i John Teo Mau Sang, Adun Sindumin, i Ahmad Haji Bujang om i Monunuat Pointatap do Komontilian Kopolintaan Kinoizonon om Pomuhaminan, i Datuk Abdin Madingkir.
Lajim, isido ponogi i Puu Parlimen Beaufort, minoboos do kopoobian diho nopo nga ointangan do koimau papavakas do kotoinaan PBT, id sampaping do popoingkavas mogisusuvai koumatan kotundaan id pototongkop pogun Sabah diti.
Naamot diho, minoboos isido do popoiho isido sondii do kopoobian di pobuzuon do PBT kumaa doid hahansanon layat om Puu Parlimen doid pamalanan kotundaan id uvang tososondii.
“Di poguhui diti, kivaa vookon hahansanon layat om Puu Parlimen do au koiho projik kotundaan id uvang tososondii, papasabap do kivaa kahasaan kolotian id tatanga dioho,” ka disido.
Id kobuuon ponogi diho, pinopoingat id Lajim do mooi o saviavi PBT manaak kahantazan tosisikap kumaa doid upalai lisin pongindopuan, miampai ouhan, aadang om ouhi kumaa doid tinimungan mongingindapu id pogun diti.
Montok tuduvan diho, popointutun o komontilian disido do piipio insentif om nogi pomo’uangan vinasi, kaampai kopoonjulan Hongkod Posoihi (OSC) id suang atag popobuu o kohobusan Certificate Of Completation om Compliance (CCC) kumaa doid tinimungan professional id pogun Sabah diti.
Minoboos vagu di Lajim do manaak o komontilian disido do pongumbanganan kumaa doid pomo’uangan vinasi kumaa doid kopohobusan lisin mongindapu om lisin komposit hutil om Sistem Star Rating do PBT (SSR-PBT) id pogun diti.
|
