|
12th March, 2010
KOTA KINABALU: Kiginumu do 95 tuhun minaganu do Sijil Pelajaran Malaysia (SPM) id Sabah nakahantoi nakaanu do gred A (A+,A om A-) id suang saviavi mato balajalan i naanu piagahon 14 tuhun di toun 2008.
Kumoduvo Potunud Balajalan Sabah Hajah Maimunah Haji Suhaibul minoboos, ginumu susumikul i nakapaas montok saviavi mato balajalan nga nouangan ino nopo nga 14,417 tuhun piagahon 13,812 susumikul di toun 2008.
Sundung i do ingkaa ka disido, songuhun no susumikul mantad Sabah i nakaanu do kinapaasan 14A id suang saviavi mato balajalan i naanu.
“Kogumuan susumikul di suvai nakaanu do 13A (apat tuhun susumikul), 11A (23 tuhun), 10A (29 tuhun) om 9A (27 tuhun),” ka disido kuminaa magaganu abal id doiti, di koniab.
Minoboos i Maimunah, id saviavi dino, nangangazan minaganu SPM id Sabah, montok toun 2009 kopongunsikou.
“Mantad 33,262 tuhun i minaganu sikul takavas kabangsaan i minaganu do panaasan diti kiginumu do 31,198 toi ko 94.39 piatus nakahantoi nakaanu do sijil SPM, ino nopo nga miampai do nakatanud saviavi ponuuan sokuukuang no kozo nakapaas do mato balajalan Bahasa Melayu piagahon 29,238 toi ko 94.85 piatus di toun 2008.
“Iti kilati do nangangazan diti pinopokito do tokuudi kinotuunan mantad toun 2008 ino nopo nga kiginumu do 0.46 piatus. Sundung i do ingkaa nangangazan diti kakal nakadampot nangangazan kabangsaan miampai do 3.6 piatus,” ka disido.
Ka vagu disido, kiginumu do 1,946 i poinsikul id Sabah nakaanu do sokuukuang no kozo gred C (A+ gisom C) montok saviavi mato balajalan i miniikau id suang SPM 2009, piagahon 1,910 toun poguhui diti.
Vookon susumikul cemerlang SPM 2009 id Sabah nopo nga Raihan Annuar Batcha, Allan Yong, Teo Chia Pei om Edrea Rumba Pan mantad SM All Saints Kota Kinabalu, Elijah Cornelius Wong Khiun Fah (SM Lok Yuk Kota Kinabalu), Cynthia Chee Yin (SMK Sung Siew Sandakan), Choo Yik Wei om Cephas Philip Liew Yeng Ling (SM St.Patrick Tawau), Cleo Tinid (SM Datuk Peter Mojuntin Penampang) om Azleo Kristo Mozihim (SM La Salle KK).
Vookon sikul i nakaanu kahantazan dino nopo nga SMK Sains Kota Kinabalu, SM Sains Lahad Datu, SM All Sains Kota Kinabalu om SM Agama Kota Kinabalu.
Montok sikul ngavi dahabus kakadazan i nakaanu kahantazan ino nopo nga SM St.Micheal Penampang, SM Agama Limauan Kimanis Papar, SM Saint Francis Xavier Keningau, SM Teknik Keningau, SMK Tun Said Kota Belud, SMK Dtk Peter Mojuntin Penampang, SM St.James Tenghuilan, SMK Agama Ranau om SM St.Paul Beaufort.
|
