|
11th March, 2010
NAU: Montiri Kopotundaan Labus Kakadayan Datuk Dr Ewon Ebin minoboros ginoris do koporintaan Barisan Nasional (BN) mimpau di pisokodungan, pogirorotian om pisompuruan togirot di tongo’ puru parti komponen dilo’.
Ka disio, pogiupakatan toinsanan puru parti komponen kokomoi koinsanai ahal kopongimbulai po nogi’ do piuludan mimpulitik om kopoindalanan kotundaon i napalan kumaa rayat.
“Kohondot dilo’, nunu-nunu i amu’ kohunung toi amu’ kopogiagalan pomusarahan kiguno salasaion id mija’ pirundingan di toinsanan bohogian mooi do aanu kootusan i kosontob ginawo di toinsanan puru,” ka disio.
Minoboros isio dilo’ di maso pinapatahak panambarasan kitulu do “Kaantaban om Rikoton id Kopoinggorisan Kopoburuan Parti Upko” id Kiim Kopongunsuban om Piintutunan i pinaanjur do Tinimungan Komulakan Upko doid Tagal Kampung Luanti, di kaawagu diti.
I Ewon i po nogi’ Timbang Presiden Upko di kaawagu diti sinili sabaagi Ponorikohon BN Ranau di wagu, minonowoli di Puru Parlimen Ranau i Datuk Siringan Gubat.
Miampai minonongkounsikou kuminaa di Luguan Montiri Datuk Seri Najib Tun Razak om i Boyoon Montiri Sabah Datuk Seri Musa Aman mantad kinoposilihan dilo’, pinokianu disio toinsanan puru parti komponen do tumilombus manahak sokodung ouli’ kumaa kopomuruanan om koporintaan BN.
Ka disio, montok monginggoris do kukumaraja’ BN id Ranau, momolohou isio do iso’ mitingan kumoinsan i kapaatag do pipiro ababayan om minagangat di toinsanan lalansanon om upisor koporintaan mindahu’ do popointalang di kopoindalanan do Kaganaan Keberhasilan Poinbida’ Pogun (NKRA).
Kiim kopongunsuban dilo’ i natanud di 30 puru komitimonguasa’ Komulakan Upko kirikoton do manahak kapabantaan di kopomuruanan sabaagi tutumungkus kopomuruanan pogun do dumontol.
Id panambarasan disio, nunsub po nogi’ di Ewon o tongo’ komulakan do tumabung doid ababayan ikonomi i koponokodung diolo’ mamagampot iman-imanon.
“Suai ko’ mimpulitik, komulakan nga’ kiguno po nogi’ do popogoris ikonomi sabab ilo’ no i koponokodung doid kopoindalanan om kapalantaion koinsanai palan,” ka disio.
Nokotindapou po nogi’ i Luguan Tinimungan Komulakan Upko Longkod i Arthur Sen, Luguan Komulakan Upko Ranau i Japirin Sahadi, Timbang Luguan Koonduan Upko Longkod i Petronella Ontol om i Lansanon Komogoton Rayat (PKR) Paginatan i Jefrin Majangki.
|
