|
11th March, 2010
LAHAD DATU: Songuhun kusai nasamaanan do nopujulan kiniopon kikotumbazaan dinuso, id iso uvang pomuhominan id doiti, di totuvong songkoniab.
Kusai dino ointutunan do Lim Kim Loong, 41, i pakalaja sabaagi do kuntilikto nasamaanan id suang koozuzuvo do poinvantai om nodopos zaa id suang hamin dino di kuang hobi ja ko 7.55 totuvong.
Huguan Pulis Uvang Lahad Datu, Supt. Shamsudin Mat minoboos, boogizan disido nokotoimo do sogu kokomoi kinantakan dino om naabo-abpo kuminaa id tampat kinantakan om nokosoomo do tinan dino id suang koozuzuvo hongon disido kinagasan.
Ka disido, pinonoizukan kopoguhu pinopokito do i nogompitan kikotumbazaan minangan id boogizan bahazan doguvang om douvi miampai koumatan tokodou.
“Asil pinonoizukan id tampat kinantakan dino nokosoomo iso’ bosi kitukuan 18 inci poindoos miampai tinan di nogompitan dino,” ka disido kuminaa magaganu abal id doiti di koniab.
Mantad kinantakan dino, ka di Shamsudin boogizan disido nakapanaan songuhun kusai kiumul 43 toun montok monuhung koponoizukan.
“Kusai dino nahantoi minanaan di kuang hobi sanjaam kahapas dino id uvang di miaga. Sundung i do ingkaa, papanau tokou koponoizukan poingonop montok mongintutun nontodonon pinomodusaan dino,” ka disido.
Naamot dino, ka di Shamsudin tinan di nogompitan dino pinaatod id Hamin Pongusapan Lahad Datu montok kapamazazakan, om koponoizukan kiis papanaon tumanud seksyen 302 Kanun Koponinduahan.
|
