|
11th March, 2010
KOTA KINABALU: Mayor Dewan Bandaraya Kota Kinabalu (DBKK), Datuk Iliyas Ibrahim mokianu mooi do DBKK koinsodu mantad dadan miampai mokianu do saviavi huguan ngavi koupisan dino mooi tomoimo mongintong puu ngavi id koupisan dioho.
Iti ka disido, mooi izioho (pakakalaja DBKK) au toomod kogompit id suang abaabazan di au avasi dino.
Au zou mimang kivaa pakakalaja DBKK kogompit miampai otogian dadah, tu izioho i kogompit miampai dadah koovit tanda di au avasi kumaa kotoinaan kotinanan,” ka disido ontok minamason kopomoiganan mitingan Tagazo Tounan ko-13 Pemadam Bandaraya Kota Kianbalu, id doiti di koniab.
Minoboos i Iliyas, izioho (pakakalaja) i noihaan notogian dadah pupusan kotoinaan motnok modihin dioho koohiu do tambahut di suvai.
Tumanud disido, tumanud kumaa poguntaban i pinahabus do Agensi Anti Dadah Kabangsaan (ADDK) Komontilian Suang Pogun (KDN), pinopokito do pomogunaan syabu i kakal akavas id pogun diti kaampai no id Sabah.
“DBKK sabaagi boogizan kikuasa kinoizonn maganu tavavagat kokomoi ahal diti om mazaa Koisaan Pemadam Bandaraya diti, mongkimamaan om misokodung miampai agensi ngavi i kogompit montok mogium pisokodungan om koinsamakan,” ka disido.
Iti ka disido, montok monguhan humasa dadah kaampai no id uvang Bandaraya Kota Kinabalu montok mongintong tangangazan hizab kopolintaan montok mamadadi pogun diti koinsodu mantad dadah koikatan toun 2015.
Ontok po nogi dino, ka disido, Pemadam Bandaraya Kota Kinabalu nga mamadadi tinimungan tomuhok sabaagi do ikoton kopoguhu, tu tumanud pinonoizukan om profil notogian dadah id pogun diti pinopokito do vookon ginumu mantad notogian dadah nopo nga izioho id suang piahatan umul 15-25 toun.
Minoboos isido, vookon ginumu dino nopo nga komuhakan ngavi i kakal poinsikul mantad po toi id sikul kopolintaan, misosondi toi ko id hongkod ngavi balajalan takavas.
Mantad dino, ka disido, kopitanud miampai ikoton disido montok mamadadi bandaraya Kota Kinabalu iso bandaraya di tabaakas, ogingon om atampasi, mimang isido mooi Pemadam bandaraya montok tuutulus papanau tonggungan om papanau abaabazan ngavi kasaavan dadah id Bandaraya Kota Kinabalu.
Humansan isido Pemadam Bandaraya tuutulus mongkimamaa montok papanau abaabazan ngavi montok manaak kasaavan kumaa mogiigizon saasabap no do kinogompitan miampai dadah om popoinsi tinimungan tomuhok.
“Boogizan poguhudan DBKK tomoimo manaak sokodung om pisokodungan kumaa Pemadam Bandaraya montok mongintong abaabazan ngavi di nouhud avasi o kapapanaai,” ka disido.
Nokotindapou nogi id lamai dino, Huguan Potunud DBKK, Yeo Boon Hai i nogi Ponikoon Pemadam Bandaraya Kota Kinabalu.
|
