|
10th March, 2010
MENUMBOK: Kobohingaakangan koonuan vaig tohidang di otoguvang do tuhun mogigizon id posoihi Menumbok, hobi no id uvang habus kakadazan diho nopo nga nakaambit pomuginavaan totootopot di Puu Parlimen Beaufort, i Datuk Seri Panglima Haji Lajim Haji Ukin.
Isido i tuminindapou doid Abaabazan Juara Rakyat om Abaabazan Dialog Koupisan om Oginsi Kopolintaan songovian do mogigizon posoihi id natadon Surau Kampung Jagus, somok doiti, mimang do kobohingkaangan diho do ouhanan tosisikap.
Minoboos kuminaa doid monunuat abal di kahapas pinopoimagon abaabazan nokomoi, Lajim, i ponogi Kumoduvo Montili Pomuhaminan om Kopolintaan Kinoizonon, minongunsub do Koupisan Vaig Pogun Sabah do mogium lahan monguhan kobohingkaangan kohobuvan paip pohuzungan di nointutunan do nadadi nontodonon koonuan vaig mantad Loji Vaig Limbawang, Beaufort do au aanu pohuzungon kumaa doid tuhun mogigizon id uvang tonini nokomoi.
Potindapou nogi doid abaabazan nokomoi i Puu Hintuun Koundangan Pogun (Adun) Kuala Penyu, i John Toe Mau Sing, Panakadai Uvang Kuala Penyu, i Abd. Rahim Yakub, Kumoduvo Huguan Umno Boogizan, i Isnin Haji Aliasnih, Timbang Huguan Umno Boogizan, i Datuk Kimjus Duim om i Injiniol Vagi Uvang, i Jokriee Abdul Narudin.
Timanud di Lajim, kosudong o kopoobian po’uangon do upalazon tosisikap montok pamadakatan paip kavavagu montok haang kotihombusan.
“Nung kaanu o kopolintaan popotounda kopoobian di tagazo montok monoodo Loji Vaig, okon ko iso kaantob do kopolintaan manaak kopoobian di hobi osiibo montok mongumbasi paip di noumbak no diti,” ka disido.
Minoboos isido do Loji Vaig Limbawang di kigatang RM30 lizong, i papahabus 15 lizong liter vaig sangadau, apatut do kaanu monguhan poimponu kobohingkaangan panaakan vaig id Menumbok.
Poingkuo po nga minoboos isido do kozuvo paip pohuzungan di noomuk om nohobu diho pinapasabap do mogigizon asansagan tumoboi mongindad koonuan vaig di pohuzungon kumaa dioho.
Hobi po vagu momo’uang kozuzuvo ontok songian tumpu magadau diti, gisom do kopononsog do Upis Uvang Kuala Penyu do papaatod vaig kumaa doid mogigizon di nountazag miampai sakadai mantad Koupisan Kalaja Tagazo (JKR) om Koupisan Vaig.
Vookon kampung di kakaal potumbangan kobohingkaangan koonuan vaig tohidang nopo nga Kampung Tanjung Aru, JAgus, Kilgugus, Melikai, Menumbok om Mempakul.
|
