|
10th March, 2010
PUTRAJAYA: Huguan Montili Datuk Seri Najib Tun Razak minoboos pakalaja kopolintaan mositi monoimo kointahangan do pakalaja montok layat miaga nogi pakalaja montok iso paganakan i tagazo.
“Komozon ku, kada do kivaa koubasanan om pomusaavan pointongkizad piahatan pakalaja kopolintaan om layat i sohinaid diti okomi nopo sabaagi do momoguno.
“Mimang zou do pakalaja kopolintaan om layat i pinakalajaan adadi sabaagi iso paganakan tagazo. Id suang lati suvai, pakalajaan i tinaakmositi kopokito katabazan miaga nogi i pokionuon tokou i tavasi kumaa paganakan sondii.
“Pointantu no do haud Layat Posoguhuonon nokoikot id lati dino,” ka disido id lamai Tagazo Kotoinaan Kopolintaan Koopod om Iso (MAPPA XI) id Hongkod Konvensyen Sompomogunan Putrajaya (PICC) id doiti di koniab.
Nokotindapou nogi i Kumoduvo Huguan Montili Tan Sri Muhyiddin Yassin om Huguan Monunuat Pogun Tan Sri Mohd Sidek Hassan.
Minoboos i Najib au nogi isido mimang kivaa pomumusoou di au avasi id suang kotoinaan id nombo pakalaja kopolintaan mongintong kopotutan di okuang kumaa koupisan, agensi om komontilian dioho no.
Ka disido apat toigi kopoguhu om apat i kiguno ontodonon sabaagi pomogonop i nogi vahu impoon tagazo kotoinaan disido nopo nga saasau momogonop id piahatan tiso om di suvai.
“InsyaAllah, nung vahu impoon tagazo diti tuhukon om igitan tapapantod, mogovit ino do pakalaja ngavi kopolintaan, layat om pogun kumaa timpu dumonto di piangkab-angkab saviavi,” ka disido.
Apat toigi kopoguhu dino nopo nga gagasan 1Malaysia: Layat Posoguhuonon, Tangangazan Poguhonon, Abaabazan Kodohinan Kopolintaan om duvo pongkimamaan ikonomi montok moguhud ikoton timpu tanau, uha-uha om timpu toniibo do pogun ino nopo nga Modek Kavavagu Ikonomi om Abaabazan Malaysia Ko-10.
Apat i kigatang kopoguhu pomogonop dino nopo vagu nga Mongubas Kreativiti om Inovasi, Poposoguhu Sinikap maganu haang om monoodo kotontuan, hoogo montok usin om Hoogo Integriti.
|
