|
|
|
Minongoi sagou... mantad gibang, Ariati, Fidelina om Masuri ontok minooi sagou vaig.
|
10th March, 2010
NABAWAN: Kuang hobi 7,000 mogiigizon id suang Mukim Nabawan kotoguvang miampai kobohingkangan okuangan vaig nung timpu magadau otihombus id suang timpu sombuhan po vagu.
Pemaju Mukim Nabawan Ampulas Kaluhu ontok notuubungan di koniab minoboos, saviavi mogiigizon id mukim diti poinhansan kumaa kaganapan vaig mantad Koupisan vaig om hobi dino poinhansan kumaa kaganapan vaig paip graviti.
Sundung i do ingkaa ka disido, kogumuan kampung id posoihi kakadazan Nabawan miaga do Kg. Murni, Kg. Malinja, Kg. Ria, Kg. Bahagia, Kg. Lima om piipio kampung poindodoos babaino tumimpuun kobohingkang montok kaanu vaig tabaakas.
Ka disido, kaganapan vaig tabaakas i tikaan do Koupisan Vaig noindamaan nokuang mantad no sandad ponougan bavang Panawan noindamaan nokotuun.
“Kampung ngavi i poinhansan miampai kaganapan vaig gravity nga nokotoguvang kobohingkangan okuangan vaig tu ponougan noindamaan nokoing,” ka disido kuminaa New Sabah Times ontok notuubungan id Kg. Lima, di koniab.
Upisol Kobuuon Mogiigizon (CDO) Nabawan Barahim Andipoh i minonoodo kotombuhuzan kuminaa Kg. Lima minoboos, mogiigizon id kampung diti nasansagan do minaganu do vaig tabaakan id lahan mogisosovohi id kopohuzungan vaig paip graviti iso no nadadi do sandad vaig mogiigizon kampung diti.
“Vinakas vaig gravity dino au kaanu manaak vaig id hamin ngavi mogiigizon tu sandad dino noindamaan nokuang,” ka disido.
Ka disido, izioho kaanu nopo vaig id paip di poimbihiu id tana.
Iti po nga ka disido, mogiigizon mongindad do piipio jam montok kaanu piipio no liter vaig.
Tumanud disido tohu mohoing tondu i nasamaanan id Kg. Lima ontok managou do vaig pinopoiho, asansagan izioho minadad boogizan dioho do managou kihinaid do himo jam montok koonuan kaganapan vaig tabaakas mantad sandad vaig dino.
Songuhun mohong tondu Ariati Lumbi, 27, minoboos kaakun izioho mindad piipio jam montok koonuan kaganapan vaig tu aiso pihi suvai montok kaanu vaig tabaakas montok kogunaan magansak om inumon.
“Nung montok poduon asansagan izikoi momoguno do bavang Panawan sundung tu kabaakasan dino au ajamin,” ka disido.
Ariati miampai duvo vagu tambahut disido Fidelina Raymond, 27, om Masuri Tingkalur, 25, miampai saviavi mogiigizon Kg. Lima kaanu kaganapan vaig tabaakasn id sandad vaig id lahan mogisosovohi mantad po di minsusuvab gisom doungadau.
Montok di koikot-ikot asansagan mindad gisom himo jam montok koonuan vaig tabaakas.
Suvai ko mantad mogiigizon kampung id mukim diti, susumikul Sikul Takavas Kabangsaan (SMK) Nabawan nga nokotoguvang kobohingkangan okuangan vaig.
Moboboos Koupisan Vaig Uvang Nabawan ontok notuubungan pinopoimagon kaganapan vaig id uvang diti noindamaan nokuang.
Sundung i do ingkaa ka disido, koupisan dino mongkimamaan kaganu kaganapan vaig mantad sandad i noihaan montok pataakon kumaa mogiigizon nung kobohingkangan vaig kadampot id boogizan noindadamaan.
|
