Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Commotion in Dewan Rakyat over election of Speaker, the words 'gelap' and 'bedak' |  Ferries and passenger boats in Sabah can operate at full capacity |  Feri om padau susumakai id Sabah pakavasaon do koumpasan di oponu |  JKDM Sabah nakapagaau dadah kihoogo RM1.15 lizong |  Taska mula dibuka di Sabah dengan ikuti SOP |  Eighth rehabilitated sun bear released into the wild |  Matta urges govt to extend loan moratorium for tourism industry, protect sectors |  AirAsia Hotel Bundle Deals offer up to 50 pct savings on city hotel stays |  Air Traffic Rights applications drops 74.3 pct in 1H20 |  Belum diputuskan |  Sabahan Bulldozer cipta nama di Australia |  Mogigiyon mokiinsian kopongundaran ralan om jambatan |  Belia dari 11 kampung Mukim Rosok Bangkahak gotong-royong baiki paip |  Inisiatif NGO bersama penduduk kampung baiki kerosakan akibat banjir |  Penduduk rayu jambatan rosak dibaiki | 
 Kadazan Dusun

Mongindapu koonduan suuon sumimban kumaa pongindopuan digital

17th October, 2019

KENINGAU: Mongindapu koonduan i manaak produk mantad kotoinaan suuon sumimban kumaa pongindopuan digital i hobi ouhan om pointantu.

Montili Kotundaan Habus Kakadazan, Datuk Ewon Benedick minoboos tinimungan dino mositi momoguno tavavasi kapadagangan id talian saasabap no do pongindopuan id lahan talian baino nadadi kalalahano om koubasanan mogiigizon.

“Id suang timpu di oindamaan nobobo kobuuon, tokou mositi tumanud pomogunaan media teknologi okon nopo sabaagi do kouhanan nga nadadi iso kogunaan kopoguhu potitikid tuhun.

“Pomogunaan media digital okomi sabaagi pilotian di pointantu i nadadi kalalahano mogiigizon baino diti miampai nadadi kaganapan pitubungan tosodu.

“Ino okon nopo ouhan, nogi balanja pukuon nopo nga hobi osiibo piagahon miampai balanja pukuon siva kadai.

“Sabaagi pomitanan, momoguno impoon media sosial sabaagi kopolokuan kumaa produk toi ko kabalai monombi miampai au mongintong tampat om timpu pointantu no do kopingkikit ogumu balanja om timpu.

“Media sosial miaga do WhatApp, Facebook, Instagram, Mudah.com om media sosial suvai kaanu popobuu kapadagangan produk pongindopuan gisom kumaa nazatan sompomogunan.

“Ahal diti okon koi so di au apatut tu ogumu pomitanan tokoh koonduan di ointutunan om nakahantoi sabaagi mongindapu id suang boogizan basaan, kosmetik om suusuvai po,” ka disido.

Sundung i do ingkaa, ka disido potitikid angkab mositi potimpuunon miampai kosimbanon toihaan, koulalaho di tavasi kaampai no pointounda momouang toihaan kavavagu poompus koposizon.

“Mositi ondomon, songkuo po ginumu sakadai toi ko abaabazan pinghudaan di pinotounda do polinta montok monuhung popoinsavat ningkokoton koposizon layat, au po noihaan koovit do kahantazan, nung koulalaho om pomusoou layat kakal id kinavas di haid om au po nokotounda montok monoimo kosimbanon.

“Nung koulalaho om pomumusoou miaga dino au kosimban, otumbazaan zou layat dotokou tuutulus oduanan mantad boogizan kotundaan nasional om koidu mantad kaanu kosivatan ngaavi di pinotounda do polinta.

“Montok kahantoi, tokou mositi humabus mantad oobu mongkimamaa, ahaid do monimpuun, au katanud do timpu om ahal ngaavi di kaantob dotokou momoloso kahantazan di pokionuon.

Minoboos isido dino ontok lamai kopomoiganan Ponutuban Abaabazan Khidmat Masyarakat Pinghudaan Monombi om Kopongoputan Siri 2 2019.

Teks pason disido pinohombus di Panakadai Montili Kotundaan Habus Kakadazan Rasinin Koutis id Dewan Ginumuan, di Tadau Kotohu.

Tumanud disido, abaabazan Khidmat Masyarakat pinghudaan monombi di naazu do Komontilian Kotundaan Habus Kakadazan Sabah dino nopo nga iso mantad pongkimamaan polinta pogun montok monuhung tinau koonduan kampung, pinghudaan diti mantad tinimungan koonduan id daamin om mohoing tondu notongkizadan montok popoinsavat kabaahan id suang boogizan monombi om momouang tangangazan paganakan miampai au humansan kumaa sakadai no.

Pinghudaan naazu kihinaid do 30 tadau montok koponimpunan monombi om 25 tadau montok pinghudaan pongoputan dino pinopoompit do 30 monongkibai mantad uvang Dewan Koundangan pogun Liawan.

   
Email Print