Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Konflik manusia-gajah: Peranan m'rakat setempat penting |  Vizione's unit shortlisted to develop Papar Dam in Sabah |  Blockbuster FA Cup final in store |  Sabah football all out to reach new heights |  Malaysia Autoshow Sabah Oct 19-20 to showcase latest vehicles |  UMS, UNICEF to introduce Communication for Development Sabah programme |  1.4 lizong aiso MyKad sundung tu kiumul hobi 12 toun |  Kusai Pakistan tinaan tu au tuminanud kootulan Imigresen |  Mongindapu koonduan suuon sumimban kumaa pongindopuan digital |  Human-elephant conflict in Sabah: Local community plays crucial role in conservation |  SPSB supports Petronas LNG Ltd in third STS operation |  Value of Tabung Haji's domestic equity rises by RM1.12 bln as of Sept |  AIA launches A-Plus MedCare rider |  M'rakat Murut digalakkan terus terap bahasa ibunda |  Raymond Ahuar buat laporan polis | 
 Kadazan Dusun

KPLB popointutun Hamin Sejahtera id MESEJ om Kampung Sejahtera

19th September, 2019

KOTA KINABALU: Komontilian Kotundaan Habus Kakadazan (KPLB) Sabah popointutun kapanadaan Hamin Sejahtera Sabah id kokompungan Mini Estet Sejahtera (MESEJ) om kampung ngaavi id siibo Abaabazan Kampung Sejahtera i opihi montok fasa koiso kotimpuun toun diti.

Montili Kotundaan Habus Kakadazan Sabah, Datuk Ewon Benedick minoboos abaabazan dino nopo nga pongkimamaan kavavagu polinta pogun mazaa KPLB Sabah id siibo koinsamakan Boogizan Kapanaak Asil Kopoguhu Pogun id nombo kapanadaan hamin montok layat mosikin adadi iso mantad abaabazan kopoguhu.

Minoboos isido, pomihian kapanadaan Abaabazan Rumah Sejahtera Sabah id MESEJ om Kampung Sejahtera nopo nga saasabap no do duuduvo id siibo abaabazan pongumohigan komosikinan.

“Pinopohombus zou id suang mitingan Montili Ngaavi kogunaan Polinta Pogun popotounda sakadai poimbida montok abaabazan pomuhominan layat mosikin hoohobi no kozo id kokompungan MESEJ tu poguhui diti hamin ngaavi monongkibai MESEJ tinoodo mazaa sakadai di pinohuzung do FELDA. Au nodi tokou kotoimo sakadai dino, nga abaabazan MESEJ mositi potihombuson om uangan vinasi.

“Vozoon Montili om Montili ngaavi nakaakun om ontok pitimbungakan Dewan Koundangan Pogun vuhan nakatahib, nokotoimo tokou kiginumu RM6 lizong sakadai kouangan montok abaabazan mongumohig komosikinan.

“Sombogizan mantad sakadai dino, gunoon dotokou montok monimpuun Abaabazan Kampung Sejahtera id tohu kokompungan MESEJ ino nopo nga Timpangoh Penampang, Tukar Pitas om Abai Kinabatangan. Popobuu nogi tokou abaabazan diti kumaa piipio Kampung Sejahtera i opihi ontok toun diti,” ka disido.

Minoboos isido dino ontok pinopohombus tonggungan toniibo kopiondot mitingan Komiti Papanau MESEJ id komontilian dino, id doiti, di koniab.

Ewon i nogi Puu Dewan Koundagan Pogun (Adun) Kadamaian minoboos, Hamin sejahtera dino kivaa katatadaai sondii, ino nopo nga kivaa tohu hinimpug toodopon, dopuan, pimpoduan, hivang tombuhui toi ko langgal miampai votik minsosondii kiangkab montok popoimbuhai kointutunan sondii hamin id siibo abaabazan dino.

Minoboos isido, balanja kapanadaan Hamin Sejahtera pisosoomo RM60,000 potitikid iso.

“Humansan zou kapanadaan Hamin Sejahtera diti opongo poimponu koikatan kohimpupuson toun diti om tuutulus dino koimagon di Vozoon Montili timpuunon toun tiiso,” ka disido.

Pisosoomo 75 hamin Sejahtera fasa koiso todoon toun diti.

Tumanud di Ewon, pongkimamaan dino nogi pinotimpuun montok momogonop pilotian Polinta Hongkod montok Abaabazan Sakadai Hamin (PBR) layat mosikin mantad pot oi monoodo kavavagu toi ko mongumbasi.

“KPLB Sabah monoodo pibaasan do soosongian nopo miampai KPLB Hongkod poingkuo montok momouang vinasi kapanadaan PBR id Sabah. Pinopohombus tokou id lahan poimbida kopokionuan mooi hobi ginumu Abaabazan Kapanadaan Kavavagu PPRT gunoon id Sabah piagahon Abaabazan Mongumbasi.

“Minagahap zou nogi Potunud GIAT Mara kuminaa upis montok pibaasan kokomoi kapanadaan Abaabazan Monoodo Kavavagu PPRT id lahan IBS (industrialised building system) om nogi Ababazan Mongumbasi Hamin i nadadi iso mantad ahal di intangan kozo id suang mitingan montili ngavi Sabah,” ka disido.

Id suang mitingan dino, onuu i Ewon koikatan hahansanon ngaavi mantad Koupisan Mineral om Geosains Malaysia id suang Komiti Papanau MESEJ hoohobi no kozo dino montok monuhung pongkimamaan manaak vaig nousap id siibo tana id kokompunan MESEJ i au po nakaanu kaganapan vaig tabaakas id siibo Abaabazan Kaganapan Vaig Habus Kakadazan (BALB).

Nokotindapou nogi, Monunuat Pointatap KPLB Sabah Fredian Gan, Kumoduvo Monunuat KPLB Sabah Kumoduvo Monunuat Pointatao Aftar Nurajar, Huguan Abaabazan Hidrogeologi JMG, Jaineh Lingi, upsiol ngaavi takavas KPLB Sabah om upisol ngaavi uvang.

   
Email Print
   
 
 
E-browse