Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Sabah getting popular for incentive tourism - Liew |  Sabah to proceed with TAED and dam |  Peter wants Tambadau fans to be the 12th man |  SOSKK: Scrap the Tanjung Aru Eco Development (TAED) Project |  Four teens charged with murder of eatery owner |  Resort gives international boost to Sabah indigenous handicrafts |  Bagas PPD Ranau pinili mamaramit ‘Tokoh Guru’ |  Duvo mananakau i sumuang hamin nasagkom id Sandakan |  Komontilian Kohidasan pokionuon mongintong ahal koumohigan om kohidasan pakalaja |  Developing Sabah education system via federal and related agencies support |  Petronas Chemicals and Scomi to jointly develop, market chemical solutions |  DirectD launches Huawei purchase awareness campaign |  Lim: Inheritance tax will not be imposed in Budget 2020 |  Program kebudayaan mampu mantapkan perpaduan masyarakat |  Eddika juara Mr Kaamatan, Petra johan Unduk Ngadau anjuran Keningau Mall | 
 Kadazan Dusun

Bagas PPD Ranau pinili mamaramit ‘Tokoh Guru’

26th June, 2019

Di SALWAH ARAMAT

RANAU: I bagas Upisor Balajaran Watas, Rusining Rusidi, 63, mantad Kampung Lohan pinili sabaagi ‘Tokoh Guru’, naamot di bagas Molohingon Mongiingia Sikul Kabansaan (SK) Tibabar i Muhasip Ruman, 61, mantad Kampung Delik Lohan Ulu gina’an do ‘Tokoh Kepimpinan’ kopihondot Tadau Mongingia nayatan Watas Ranau 2019 id lintuhun mogiigiyon watas di kaawagu diti.

I Potunud Balajaran Pogun Sabah, Mistirine Radin minoboros doid kinopoimaganan ababayan dilo minamarayou do upis balajaran om tongo mongiingia id watas diti i kapaanjur do Ababayan Gaa’ Kotorinaan Cemerlang (APC) potitikid toun montok mongunsikou toluod om kotorinaan tongo mongingia m nogi tongo upisor om sitaf upis balajaran do hiti.

Ka disio, kapamaramaian Tadau Mongingia potitikid toun id nayatan watas, pogun om kabansaan kituduan do momuhondom kinolubukan, kotorinaan om tinonggungan tongo mongiingia ngaawi id kopotundaan pogun.

“Tonggungan do tongo mongingia akawas om gatangon kopio id koponuridongan timpu dumontol sinakagon mooi do kosili yolo tulun kiguno om koponokodung kumaa koburuon timpu dumontol,” ka di Mistirine.

Pinointalang disio do ulu Tadau Mongingia toun diti ‘Guru, Obor Hemah Menyinari Pertiwi’ kopiongoi kopio di kaantaban pomogunan babaino diti i kiguno toguangon do toinsanan mongiingia.

Monongkotumbayaan nogi isio do maya pogiupakatan, pisokodungan om tonggungan toinsanan mongingia, kosili yolo do iso tinimungan i kopongimbulai do tulun posunduran i kaanu monokitopong id nayatan pomogunan.

“Tonggungan do mongingia osuul nogi montok papasaga sukod wagu koponoguang kaantaban id koposion,” ka disio.

Nokopogulu i Upisor Balajaran Watas Ranau i Siti Hamni Hashim id boboroson disio minonongkounsikou kumaa di Mistirine om nogi kinoposilihan disio sabaagi Potunud Balajaran Pogun Sabah i nosili kaandasan sabaagi tulun mantad Ranau.

I Siti Hamni minomuruan nogi id kinopolombusan do taru (Lafaz Ikrar) Tadau Mongingia. Ababayan dilo rinamai di pokiikitanan sayau koubasanan tongo susumikul SK Lohan om koir di mongiingia SK Kundasang, nompot di tinimungan monguni-uni ‘Deep Buskers’ Kundasang.

Pinokitanan nogi id ababayan dilo o 19 Pokiikitanan pinosodia do tongo sikul ngaawi id watas diti. Nokotindapou nogi i Ponorikohon Kounsol Piupakatan Molohingon Sikul Watas Ranau i Jamirin Sahamin (Molohing Sikul SMK Ranau), Ponorikohon Kounsol Molohing Mongingia (MGB) Ranau i Asmail Gakau (Molohingon Mongingia SK Lohan) om i Ponorikohon Piupakatan Koisaan Molohing om Mongingia (PIBG) Watas Ranau i Dr. Sining Unchi.

   
Email Print
   
 
 
E-browse