|
3rd July, 2009
RANAU: Rayat pinokianu do amu’ adalaan tumongob di tomporuruol Influenza A (H1N1) sundung do komoyon ilo’ noilaan nokopogkoroliu di rayat pogun diti sabab tintob nopo dilo’ nga’ kakal do okuri’ om opitatamangan.
I Montiri Kopotundaan Labus Kakadayan Datuk Dr Ewon Ebin, minoboros do i nopo tosuul do powonsoiyon nga’ tumanud di pason do puru pongubatan mooi do madtamong om momogompi’ koborisian do potitikid timpu.
“Potontuon do kopomoug do longon pogulu makan toi soira’ kalabus mantad pagagawasan om potontuon koinsanai takanon om tinumon do oborisi’,” ka disio.
Minoboros isio dilo’ ontok pinopoimagon do ramai Kinopoimpuunan Koposusuan Susu Tina’ om ramai Tadau Tina’ om Noos naaytan Kolinik Kolidasan Mukim Paginatan, id lintuhun tokoro’ kampung dilo’.
Pinointalang di Ewon do tomporuruol nopo dilo’ nga’ noowit diolo’ i norolihan mantad labus pogun om okon ko’ asanang-sanang do kopogkoroliu kumaa tulun ginumuan nung amu’ no poinbanta’ dilo.
“Amu’ nuru’ do adalaan tumongob toi orosian sabab mogisusuai laang di winonsoi montok miontong do kopogkorolihan tomporuruol diti kaampai no popowonsoi kopomorisaan kolidasan kumaa di koinsanai tutumombului labus i sumuang id pogun diti,” ka disio.
Minoboros isio do sundung amu’ adalaan nga’ isaisai i kiharo tanda’-tana’ miagal do kukulan, pompogon, ongoruol tinan om osusa’ momuhobo pokionuon do mongoi pokiporisa’ id longkod pongubatan di poingoros.
Ramai nokomoi pinaanjur do Koisaan Tina’ om Noos, kihontolon do papalantoi kimpin koposusuan susu tina’ sompomogunan i ramaion do potitikid toun ontok ko 1tw gisom ko 7tw Kawalu’.
Tumanud di Ponorikohon Manganganjur i Bibiana Bantol, katatapan koposusuan susu toi gatas tina’ id Malaysia nopo nga’ mokianu di koinsanai tina’ do poposusu di tanak diolo’ mantad do osusu gisom no do onom wulan om popotilombus koposusuan dilo’ gisom kiumur do 2 toun o tanak.
Naamot dino, nunsub di Ewon o tongo’ tina’ do poposusu di tanak diolo’ tumanud di koponuhuan do noos toi bidan sabab okon nopo ko’ kapanahak kolidasan kumaa tanak nga’ kopogirot do tupus id pialatan do tanak om tina’.
Id ramai dilo’, mogisusuai ababayan pinoindalan kaampai no pialaan sukaneka om panambarasan.
Pinopolulus po nogi’ i Ewon do poruntukan RM5,500 kuminaa koisaan nokomoi montok popoindalan ababayan diolo’.
Nokotindapou po nogi’ i Monunurat Tolisok om Piromutan Ginumuan Komontirian i Dallius Ubin om i Japari Yadam om i Mongunguhup Upisor Pongubatan (PPP) Pius Bernard.
|
