|
3rd July, 2009
KOTA KINABALU: Maso id kobuzuan toi prosesn o Sabah Electricity Sdn Bhd (SESB) montok monoihi mahik koundangan di kivaa poinsandad kumaa doid mananakau vinakas lotilik montok manaak hobi vinagat ukuman kumaa doid momumuhasa.
Minaan iti binuzu kaantakan manakau vinakas lotilik di asaasau id pototongkop Sabah di maan do tuhun tososonguhun toi tinimungan di aiso tonggungan miampai popooput aiso kavasaan mantad vinakas lotilik do sesb, ka di Potunud Monijol, i Baharin Din.
Ka disido, koundangan di kivaa poinsandad do Akta Kapanaakan Lotilik 1990 Seksyen 37 (1) nopo nga au koundoonok montok mongogo do momumuhasa tu iho nopo nga manaak noopo ukuman au katahib tohu toun tolungku toi saman au katahib do RM100,000.
“Opiumanan kozo dagai do kivaa kopokionuan montok monoihi mahik do akta mooi do kapanaak hobi vinagat ukuman. Ontok ponogi diho, kopongivad do SESB mantad kotoguvang hobi ginumu kolugian do potitikid toun.
“Kahasaan diho nopo nga okon noopo ko kapasabap lizongan ringgit kolugian do tikid toun nga kapanaak nogi vaza doid ikonomi do mokikitoina di mambalai om nogi doid pogun,” ka disido.
Noboos di Baharin iti di ontok tuubungo di kahapas kinopotimpuunan do Kimpin Inadas vinakas om Koumohigan i pinoimagon di huguan Kotundaan Kagaan Tuhun, i Datu Jamigol Datu Silan id Hintuun SESB di koniab. Abaabazan diho nopo nga pinaanjul miampai sokodung do Energy Commission om SIRIM om tinindapou do kuang hobi 150 susumikul om mongingia mantad 12 sikul pangan takavas posoihi do doiti.
Songovian diho ka di Baharin, kiis manakau vinakas lotilik id Sabah nopo nga i takavas no kozo pibagahon doid pogun ngaavi suvai tu doiti nopo dotokou nga ‘hobi ginumu modidikot aiso kavasaan di minomuhamin di tana ngaavi polinta.”
“Sabap diho no do kokito tokou do pongoputan aiso kavasaan id dawai ngaavi do SESB id nomboo kivaa do hamin sompupuu (setinggan). Kivaa nogi kiis manakau vinakas lotilik di minaan do kotinanan ngaavi pidagangan.
Nahantoi do SESB o 13 kiis mantad 15 kiis di kogompit manakau vinakas lotilik om nanaaku minaganu mahik hobi RM200,000 mantad kinolugian, ka disido.
Ka disido, au kaanu monguhan o komponi polinta do kobohingkaangan diti sosondii nga momoguno do sokodung mantad tuhun ginumuan om nogi oginsi di kogompit. Sabap diho no di kavavagu diti do opulokis iziho doid kalaja momutu ngaavi pongoputan aiso kavasaan mantad vinakas lotilik do SESB.
Id tudizo do nookuo o SESB au monumbozo vookon upalai montok koonuan pongoputan di poinvasa, minoboos i Baharin do mositi izioho mombii piipioahal poguhui izioho do papavasa diho.
“Mositi zikoi do monoihi potitikid upalai poguhui do kaanu zikoi manaak vinakas kumaa doid hamin di kogompit. Nung au katanud iho do kopokionuan, hiadon dagai o upalai dino.
“Kogumuan dioho di mongupalai do lotilik nopo nga okon ko poinvaa o hamin dioho id tana sondii. Sistom diho nopo nga mokianu do potitikid mongungupalai (nung okon ko tana toi hamin dioho) mositi mokianu kavasaan sanganu do tana toi hamin nung kumaandak no izioho do mongupalai pongoputan vinakas lotilik,” ka disido.
|
