|
|
|
Azizah pinopotunui do gaa kumaa songuhun mantad susumikul SMK Kota Klias.
|
3rd July, 2009
BEAUFORT: Montili Kotundaan Mogiigizon om Ahal Momoguno Datuk Hajah Azizah Mohd Dun monuu saviavi susumikul mooi mongkimamaa kozo balajal montok humantoi balajalan montok popoinsvat ningkokoton koposizon paganakan.
Minoboos isido, iti saasabap no do mazaa balajalan no i kaanu papadahin koposizon sosonguhun i kikobohingkangan kumaa di hobi poingunda.
“Montok humantoi do ikoton dino, mohoingon mositi manaak sokodung om pongunsuban kumaa tanak ngavi dioho. Tonggungan mohoingon sabaagi do mongia do tanak kiguno kozo sundung tu tanak dotokou poinsikul tu vookon ginumu koposizon dioho poovion id daamin,” ka disido.
Minoboos isido dino ontok minamason id lamai Kapanaakan Gaa Kahantazan Sikul SMK Klias 2009, id dewan sikul dino, di koniab.
Nokotindapou nogi, Mohoingon Sikul SMK Kota Klias Jaya Silar A/L Muniadi, Yang Dipertua Koisaan Mohoingon om Mongingia (PIBG) Johari Matusin, pakadai takavas kotoinaan sikul dino, hahansanon upisol balajalan uvang Beaufort, mongingia om tanak sikul.
Azizah i nogi Puu Dewan Koundangan Pogun (Adun) Klias minoboos, lamai kapanaakan gaa miaga diti nopo nga sabaagi do pamahagaan kumaa susumikul i nakaanu kahantazan tavasi id suang panaasan.
“Iti nopo nga tadau montok momohoogo dioho i minongkimamaa kozo mongkinobos gisom nakaanu kahantazan tavasi i kopongunsikou id po toi panaasan sikul, panaasan Penilaian Menengah Rendah (PMR), Sijil Pelajaran Malaysia (SPM) om Sijil Tiggi Pelajaran Malaysia (STPM).
“Kinoinsavatan kinapaasan Panasan PMR, SPM om STPM sikul diti kopongunsikou kozo. Kounsikaan kumaa dioho i nakaanu kahantazan tavasi, ahansan kahantazan diti adadi sandad angkab om pongunsub kumaa susumikul suvai,” ka disido.
Minoboos i Azizah, pisokodungan om sokodung mohoingon nga kiguno id suang humantoi hizab ikoton kinoponuidangan Koisaan Mohoingon om Mongingia (PIBG) ino nopo nga mintamong kotundunan om kopotutan susumikul.
“Kopiondot dino, pisokodungan i togiot piahatan mohoingon om mongingia nopo nga kiguno montok humantoi visi om misi sikul.
“Kinahantazan i naanu do mohoingon om mongingia sikul diti nopo nga nokoikot do mogisusuut miampai katabazan om pinongkimamaan do PIBG. Miampai dino humansan zou pongkimamaan tavasi diti potihombuson mooi hobi ginumu kahantazan aanu ontok timpu mikot,” ka disido.
Id lamai dino minanakadai nogi i Azizah RM20,000 kumaa boogizan sikul montok momohi do kouhanan miaga do aircond om kouhanan suvai id sikul dino.
|
