|
2nd July, 2009
PUTRAJAYA: Soginumu do 38 kiis kavavagu do Inflyuenza A (H1N1) do noihaan gisom di kosuab koniab, i mantad do 33 kiis import om himo kiis kinoohian kinoizonon, minamadadi ginumu savi avi do 196 kiis.
Minoboos i Montili Kohidasan, i Datuk Seri Liow Tiong Lai do mantad 38 kiis nokomoi, 30 kiis di kopogompit do layat Malaysia om vauh layat songkosuvazan.
“Vahu layat songkosuvazan diho nopo nga himo mantad Indonesia, tososondii iso mantad Sweden, Palestin om Argentina,” ka disido kuminaa doid magaganu abal do doiti di koniab.
Naamot do kiis kinoizonon nopo nga kopogompit tohu kiis susumikul mantad Sikul Pangan Takavas (SM) Tsun Jin, Lahan Loke Yew, Cheras, Kuala Lumpur, duvio kiis nopo nga kontak kumaa doid kiis import ko-147 om iso kiis kontak kumaa doid kiis ko-143.
Minoboos i Liow so gisom di baino, soginumu 86 susumakit do kakaal monoimo pongusapan om 110 nopo nga nohingasan no poimponu.
“Kinoponutuban sikul nopo nga kakaal do duvo sikul, iho nopo nga sikul SM Tsun Jin Cheras, Kuala Lumpur om Sikul Takavas Chung Hwa, Seremban.
Ginumu kiis kuarantin nopo nga 4,668 om timpu kuarantin nopo diho nga opupusan do tadau Kohimo diti,” ka disido.
Pinopoboos nogi i Liow do pomo’uangan 29 kolinik Kohidasan id pototongkop pogun om himo hamin pongusapan swasta id Lembah Klang montok popotounda kotoinaan pogonuan sampel montok kiis di natantaman H1N1 toi ko i nointutunan sabaagi hangou vogok.
Himo hamin pongusapan diho nopo nga id Sunway Medical Centre, Pantai Medical Centre, Sime Darby Medical Centre, Gleaneagles Intan Medical Centre om Prince Court Hospital.
Minoboos nogi isido do pomogunaan ‘rapid test kit’ nga au nogi pavasaon montok papapanau poniisan Influenza A H1N1 tu poniisan diho nopo nga au asabi om spesifik montok mongiho koohian H1N1.
Pinopointahang nogi i montili nokomoi do susumakai id kotuhudan di isooi miampai kiis di noimagon noohian H1N1 nopo nga okon ko savi avi maan kuarantin, noopo di susumakai id tohu nuzudan id doguhu om tohu nuzudan id douvi do kiis.
|
